रवि लामिछानेलाई थप ७ दिन हिरासतमा राख्न अदालतको अनुमति

काठमाडाैँ– पूर्वगृहमन्त्री तथा राष्ट्रिय स्वतन्त्र पार्टी (रास्वपा)का सभापति रवि लामिछानेलाई थप सात दिन हिरासतमा राखेर अनुसन्धान गर्न जिल्ला अदालत कास्कीले अनुमति दिएको छ। 

न्यायाधीश चन्द्रकान्त पौडेलको इजलासले लामिछानेलाई आजदेखि थप सात दिन हिरासतमा राखेर अनुसन्धान गर्न अनुमति दिएको अदालतका सूचना अधिकारी सुरज अधिकारीले जानकारी दिए। सहकारी प्रकरणमा पक्राउ परेका पूर्वप्रहरी नायब महानिरीक्षक छविलाल जोशीलाई पनि त्यति नै दिन हिरासतमा राख्ने अनुमति दिएको उनले बताए। दुवै जनालाई आज अदातलमा उपस्थित गराइएको थियो।

सूर्यदर्शन बचत तथा ऋण सहकारी संस्था लिमिटेड पोखराको सहकारी ठगी तथा संगठित अपराधसम्बन्धी मुद्दाका सम्बन्धमा लामिछानेलाई शुक्रबार काठमाडौँबाट पक्राउ गरी पोखरा लगिएको थियो। थप अनुसन्धानका लागि पक्राउ परेको मितिदेखि लागू हुने गरी आइतबार छ दिनको म्याद थपिएको थियो। लामिछानेलाई पहिलो पटकको म्याद सकिएपछि आज पुनः अदालत उपस्थित गराइएको हो। 

पूर्वप्रहरी नायब महानिरीक्षक जोशी पनि सोही सहकारी ठगी प्रकरणमा अनुसन्धानका क्रममा एक महिनादेखि प्रहरी हिरासतमा छन्।

पोखरामा लामिछानेका समर्थकका साथै सहकारी पीडितका छुट्टाछुट्टै प्रदर्शनका कार्यक्रम जारी रहेकाले सुरक्षा व्यवस्थालाई कडा बनाइएको प्रहरीले जनाएको छ।