हङकङ सिक्सेस: अस्ट्रेलियाविरुद्ध नेपाल ११ रनले विजयी

काठमाडौँ– हङकङमा जारी २०औँ हङकङ सिक्सेसमा नेपालले अस्ट्रेलियालाई पराजित गरेको छ। कप्तान सन्दीप जोराको उत्कृष्ट ब्याटिङ र प्रतिश जिसीको सानदार बलिङमा अस्ट्रेलियालाई ११ रनले हराउँदै नेपालले लगातार जित हासिल गरेको हो। 

नेपालले दिएको ११२ रनको लक्ष्य पछ्याएको अस्ट्रेलिया निर्धारित ६ ओभरमा सबै विकेट गुमाएर १०० रनमा समेटियो। अस्ट्रेलियाका ज्याक वुडले सर्वाधिक ५५ रन बनाए। नेपालका प्रतिश जिसीले ३ विकेट लिए। लोकेश बम र विवेक यादवले समान १–१ विकेट लिए। 

यसअघि टस हारेर पहिले ब्याटिङ गरेको नेपालले ६ ओभरमा २ विकेट गुमाउँदै १११ रन बनाएको थियो। नेपालका कप्तान सन्दीप जोराले ५१ रन बनाए। उनले १६ बलमा ५ चौका र ४ छक्का हाने। लोकेश बमले ३३, विवेक यादवले १२ तथा राशिद खानले १२ रन बनाए। अस्ट्रेलियाका ज्याक वुडले २ विकेट लिए ।

नेपालले पहिलो खेलमा इंग्ल्यान्डलाई ६ विकेटले हराएको थियो। नेपालले क्वार्टरफाइनलमा शनिबार नै श्रीलंकासँग खेल्दैछ।