जनशक्ति अभावले बन्द हुँदै घरेलु उद्योग

बागलुङ– जनशक्ति अभावले जिल्लाका घरेलु तथा साना उद्योग बन्द हुन थालेका छन्। गत आर्थिक वर्ष २०८०/८१ मा उद्योग दर्ता गर्नेभन्दा लगत कट्टा गर्नेको संख्या बढी देखिएको हो।

बढ्दो बसाइँसराइ, शिक्षा तथा रोजगारीका लागि विदेश पलायनलगायत कारणले जनशक्ति अभाव भई जिल्लाका उद्योगहरू बन्द हुन थालेका जिल्लास्थित पर्यटन तथा उद्योग कार्यालयको तथ्यांकले देखाउँछ। 

गत आर्थिक वर्षमा ४६ उद्योग दर्ता भएका छन् भने ६७ उद्योगको लगत कट्टा गरेका कार्यालयका प्रमुख पारसिंह थापाले जानकारी दिए। उनका अनुसार गत आर्थिक वर्षमा सात उत्पादनमूलक, १५ कृषि तथा वनजन्य, छ पर्यटनसम्बन्धी उद्योग, १८ सेवामूलक गरी ४६ वटा उद्योग दर्ता भएका छन्। 

एक वर्षमै ६७ वटा उद्योगहरू भने बन्द भएको जानकारी थापाले दिए। उनका अनुसार उत्पादनमूलक ११, कृषि तथा वन जन्य १८ उद्योग, पर्यटनतर्फ १७ उद्योग, सेवामूलक २१ वटा उद्योगले लगत कट्टा गरेका छन्। 

“बसाइँसराइ र वैदेशिक रोजगारीको प्रभावले घरेलु तथा साना उद्योग बन्द हुने क्रम बढेको हो। साथै अनुदान तथा आर्थिक गतिविधि देखाउन दर्ता गर्ने र पछि बन्द गर्नाले पनि उद्योगको संख्या घटेको हो”, प्रमुख थापाले भने, “वाणिज्यतर्फ फर्म दर्ता गर्ने बढी छन्।”

१०४ फर्म दर्ता हुँदा ८८ को लगत कट्टा गरिएको उनले बताए। उनका अनुसार अहिले पर्यटन तथा उद्योग कार्यालयमा ३१८ उद्योग र ४७२ वाणिज्यतर्फका फर्म नवीकरण भएका छन्।