च्याम्पियन्स लिग: लिभरपुलसँग हार्‍यो रियल मड्रिड

काठमाडौँ– युरोपेली च्याम्पियन्स लिगमा लिभरपुलले साबिक विजेता रियल मड्रिडलाई २–० ले हराएको छ। 

बुधबार राति एनफिल्डमा भएको खेलमा लिभरपुलका लागि एलेक्स म्याक एलिस्टर र कोडी गाक्पोले गोल गरे। लिभरपुल प्रतियोगिताका पछिल्ला ५ खेलमा ५ जितसहित तालिकाको शीर्षस्थानमा छ। 

लिभरपुलको नयाँ प्रशिक्षकका रूपमा आर्ने स्लट आएयता १९ खेलमा यो १७औँ जित हो। खेलमा दुई सुपरस्टार, लिभरपुलका मोहम्मद सलाह र रियलका केलियन एमबाप्पे पेनाल्टीबाट चुकेका थिए।  

यस जितसँगै रियलविरुद्ध लिभरपुलले पछिल्ला ८ खेलको जितहीन यात्रा टुंग्याएको छ। रियलको पाँच खेलमा यो तेस्रो हार हो। यससँगै उसको नकआउट चरण यात्रा कठिन बनेको छ। रियल ६ अंकसहित तालिकाको २४औँ स्थानमा छ।