अन्तर्राष्ट्रिय बजारमा कफीको मूल्य सन् १९७७ यताकै उच्च

ब्राजिलमा खडेरीका कारण सीमित आपूर्ति हुने देखिएसँगै अरेबिका कफीको मूल्य सन् १९७७ यताकै उच्च बिन्दुमा पुगेको छ ।

न्युयोर्कमा सूचीकृत अरेबिका कफीको एक पाउन्डको मूल्य ३० वर्षको उच्च मूल्यस्तर पार गर्दै ३२०.१० अमेरिकी सेन्टसम्म पुगेको छ।

ब्राजिलमा उत्पादन हुने अरेबिका कफीको मूल्य सन् १९७७ मा अहिलेसम्मकै उच्च ३३७.५० अमेरिकी सेन्ट थियो।

विश्वमा सबैभन्दा धेरै कफी उत्पादन गर्ने देश ब्राजिलले यस वर्ष कीर्तिमानी खडेरीको सामना गर्नुपरेको छ। यसले सन् २०२५/२०२६ मा कफीको उत्पादनमा ह्रास आउने भएपछि मूल्यमा वृद्धि भएको हो।

नेदरल्यान्डस्थित राबो बैंकका वरिष्ठ विश्लेषक गुइल्हर्मे मोरियाका अनुसार अक्टोबरमा आएको वर्षाले बालीनालीलाई फाइदा पुर्‍याए पनि कफीको मूल्य वृद्धि हुने बताइएको छ। 

विश्लेषकहरूका अनुसार ‘रेड सी’ मा ढुवानीमा अवरोध, सम्भावित अमेरिकी कर वृद्धि र भविष्यमा वन फडानीमा युरोपेली युनियनको नियमनजस्ता भूराजनीतिक कारकले पनि मूल्य वृद्धिलाई बढवा दिएको छ।

“माग उच्च रहे पनि किसानले आवश्यक पर्ने मात्राको मात्र बिक्री गर्न रोजेका छन्, जसले गर्दा स्थानीय बजारमा कफीको आपूर्ति सीमित भएको छ,” मोरयाले भने।

धेरै अवधि सुक्खापनको सामना गरेको भियतनामले पनि यस वर्ष पनि तत्काल कफीको लागि प्रयोग गरिने सस्तो ‘रोबस्टा बिन’को आपूर्तिमा अभावको सामना गरेको छ। 

लन्डनमा सूचिकृत रोबस्टाको मूल्य प्रतिटन पाँच हजार २०० अमेरिकी डलर हाराहारीमा रहेकोमा सेप्टेम्बर मध्यमा पाँच हजार ८२९ अमेरिकी डलर पुगेको थियो।