अन्तःशुल्क स्टिकरको भ्रष्टाचारमा दोषी ठहर भएका विकल र सफललाई ८ वर्ष कैद

काठमाडौँ– विशेष अदालतले सुरक्षण मुद्रण केन्द्रका तत्कालीन कार्यकारी निर्देशक विकल पौडेल र निर्देशक सफल श्रेष्ठको सजाय निर्धारण गरेको छ। 

अदालतले दुवै जनालाई आठ/आठ वर्ष कैद, तीन करोड ४२ लाख २२ हजार ८०० रुपैयाँ बिगो र सोही बराबर जरिबाना निर्धारण गरेको हो।

विशेष अदालतका अध्यक्ष टेकनारायण कुँवर, न्यायाधीशद्वय खुशीप्रसाद थारू र रितेन्द्र थापाको इजलासले अन्तःशुल्क स्टिकर छपाइमा भएको भ्रष्टाचार मुद्दामा दोषी ठहर भएका पौडेल र श्रेष्ठलाई बिहीबार सजाय निर्धारण भएको हो।

अदालतले पौडेल र श्रेष्ठलाई गत कात्तिक १४ गते दोषी ठहर गरेको थियो। अन्तःशुल्क स्टिकर छपाइको भ्रष्टाचार मुद्दामा विशेष अदालतले तत्कालीन मुख्यसचिव वैकुण्ठ अर्यालसहितलाई सफाइ दिने निर्णय सुनाएको थियो।

अख्तियार दुरुपयोग अनुसन्धान आयोगले गत असार ९ गते १२ जनाविरुद्ध मुद्दा दायर गरेको थियो। आयोगले मुद्दामा अन्तःशुल्क स्टिकर खरिदमा अनियमितता गरेको कसुरमा ३८ करोड ६७ लाख १७ हजार ६४० बिगो असुल गर्न माग दाबी गरेको थियो।