सुपर काबेली ‘ए’को सफल परीक्षण, राष्ट्रिय प्रसारण लाइनमा जोडिँदै

फुङलिङ– ताप्लेजुङको सिरिजंघा गाउँपालिकामा निर्माण गरिएको सुपर काबेली ‘ए’ जलविद्युत् आयोजनाको परीक्षण  सफल भएको छ। काबेली खोलामा निर्माण भएको आयोजनाको क्षमता १३.५ मेगावाट रहेको छ। 

आयोजनाका जनसम्पर्क अधिकृत मेघनाथ ढुंगानाका अनुसार परीक्षण आइतबार शुरू भएको थियो। परीक्षण सफल भएसँगै नेपाल विद्युत् प्राधिकरणका प्राविधिकले अन्तिम जाँच तथा निरीक्षण गरी शनिबारसम्ममा आयोजनाबाट उत्पादित विद्युत् राष्ट्रिय प्रसारण लाइनमा जडान गर्ने तयारी भइरहेको छ। आयोजनाबाट उत्पादित विद्युत् नेपाल विद्युत् प्राधिकरणको पाँचथरस्थित अमरपुर सबस्टेसन (१३२ केभीए क्षमता) मार्फत राष्ट्रिय प्रसारण लाइनमा जोडिनेछ। 

सिरिजंघा–८ याम्फुदिनको राते खोलामा अवस्थित विद्युत्‌गृहबाट अमरपुर सबस्टेसनसम्म करिब ३१ किलोमिटर दूरीमा रहेका प्रसारण लाइनको परीक्षण पनि सफल भएको छ।  सुपर काबेली ‘ए’ जलविद्युत् आयोजना स्नो रिभर्स लिमिटेडले निर्माण गरेको हो।

२०७९ मंसिर अन्तिम साताबाट शुरू भएको आयोजना २ अर्ब ६३ करोड २९ लाख रुपैयाँ लागतमा निर्माण सम्पन्न भएको हो।