लुम्बिनीलाई हराउँदै एनपीएलमा विराटनगरको पहिलो जित

यसअघि लगातार दुई खेलमा पराजय बेहोरेको विराटनगरले लुम्बिनी लायन्सलाई २ विकेटले पराजित गर्दै पहिलो जित निकाल्न सफल भएको हो।

उकालो

बुधबार, १९ मंसिर, २०८१

लुम्बिनीलाई हराउँदै एनपीएलमा विराटनगरको पहिलो जित

काठमाडौँ– नेपाल प्रिमियर लिग (एनपीएल)मा विराटनगर किंग्सले पहिलो जित निकालेको छ। यसअघि लगातार दुई खेलमा पराजय बेहोरेको विराटनगरले लुम्बिनी लायन्सलाई २ विकेटले पराजित गर्दै पहिलो जित निकाल्न सफल भएको हो।

लुम्बिनीले दिएको १९२ रनको विशाल लक्ष्य विराटनगरले एक बल अगावै ८ विकेट गुमाएर पूरा गर्‍यो। विराटनगरका लागि लोकेश बमले सर्वाधिक ७१ रन बनाए। उनले ४७ बलमा ३ चौका र ६ छक्का प्रहार गरेका थिए। मार्टिन गप्टिलले १७ बलमा ६ चौकाको सहयोगमा २८ रन जोडे। बसिर अहमदले २३ बलमा चौका र छक्काको सहयोगमा ४० रन जोडे। राजेश पुलामीले १० बलमा ४ रन जोडे। यस्तै, प्रतिस जिशीले ३ बलमा ६ रन बनाएर आउट भए। कप्तान सन्दीप लामिछाने १ रन बनाएर आउट भए। क्रिस सोलले ४ बलमा नट आउट १४ रन बनाए।

लुम्बिनीका लागि दुर्गेश गुप्ताले ३ तथा साद विन जाफर र रामोन सिमन्सले २/२ र विवेक यादवले १ विकेट लिए।

यसअघि कीर्तिपुरस्थित त्रिवि क्रिकेट मैदानमा टस हारेर ब्याटिङको निम्तो पाएको लुम्बिनीले निर्धारित २० ओभरमा ७ विकेट गुमाएर १९१ रन बनाएको थियो। लुम्बिनीका लागि कप्तान रोहितकुमार पौडेलले २० बलमा ४ चौका र २ छक्कासहित सर्वाधिक ४६ रन बनाए। यस्तै, टम मुर्सले ३०, अर्जुन साउदले १७, आशुतोष घिरैयाले १५ र सन्दीप जोरा १२ रन बनाए। लुम्बिनीका ४ ब्याटर रनआउट भएका थिए जसमध्ये २ वटा शानदार डिरेक्ट हिट थियो। तीबाहेक सन्दीप लामिछाने, राजेश पुलामी र इस्मत आलमले १/१ विकेट लिए।

लुम्बिनी लायन्सका लागि यो लिगको पहिलो खेल हो। लगातार दुई खेल हारेको विराटनगर किंग्सले तेस्रो खेलमा जित निकाल्न सफल भएको छ। विराटनगर यसअघि जनकपुरसँग ८ विकेटले तथा सुदूरपश्चिमसँग ९० रनले पराजित भएको थियो।

प्रतिक्रिया दिनुहोस !