एनपीएल : सुदूरपश्चिमले काठमाडौँलाई दियो १६८ रनको लक्ष्य

काठमाडौँ– नेपाल प्रिमियर लिग (एनपीएल)को बिहीबारको दोस्रो खेलमा सुदूरपश्चिम रोयल्सले काठमाडौँ गुर्खाजलाई जितका लागि १६८ रनको लक्ष्य दिएको छ।

त्रिवि क्रिकेट मैदान कीर्तिपुरमा टस हारेर पहिले ब्याटिङको निम्तो पाएको सुदूरपश्चिमले निर्धारित २० ओभरमा ६ विकेट गुमाएर १६७ रन बनाएको हो।

सुदूरपश्चिमका लागि ब्रान्डन म्याकमुलेनको अर्धशतक प्रहार गरे। उनले ३६ बलमा ४ छक्का र ३ चौकाको मद्दतले सर्वाधिक ५४ रन बनाए।

कप्तान दीपेन्द्रसिंह ऐरीले ४२ रन बनाए। ऐरीले २५ बलमा २ छक्का र ३ चौका प्रहार गर्दै ४२ रन जोडेका हुन्।

यस्तै, विनोद भण्डारीले ३५, सैफ जैबले ११, रोहन मुस्तफाले चार र आरिफ सेखले ३ रन बनाए। खेलमा अविजित रहँदै स्कट कुग्गेलिजनले ७ र इसान पाण्डेले १ रन बनाउँदा सुदूरपश्चिमले अतिरिक्त १० रन पायो। 

काठमाडौँका लागि रासिद खानले सर्वाधिक २ विकेट लिए। गेर्हार्ड इरास्मस, शाहब आलम र कप्तान करण केसीको नाममा १/१ विकेट रह्यो। अहिले काठमाडौँले जवाफी ब्याटिङ गरिरहेको छ। 

काठमाडौँले यसअघि दुई खेल खेलेकोमा एउटा मात्र विजयी भएको छ भने सुदूरपश्चिम पहिलो खेलमै जित हासिल गर्न सफल भएको थियो।