सेती जलविद्युत् आयोजनाले थाल्यो व्यापारिक उत्पादन

कास्की– २५ मेगावाट क्षमताको सेती जलविद्युत् आयोजनाले व्यापारिक उत्पादन शुरू गरेको छ। आयोजनाको पावर प्लान्ट र ‘इन्टरकनेक्सन’ परीक्षणपछि व्यापारिक उत्पादन थालिएको हो।

आयोजनाबाट उत्पादित बिजुली नेपाल विद्युत् प्राधिकरणको प्रणालीमा प्रवाह भइसकेको प्रवर्द्धक कम्पनीका कार्यकारी अध्यक्ष जगबहादुर पोखरेलले बताए। आयोजनाबाट उत्पादित  बिजुली माछापुच्छ्रे गाउँपालिका–४ लाहाचोकस्थित प्राधिकरणको सबस्टेसनमा जोडिएको छ। आयोजनामा ५ अर्ब रुपैयाँभन्दा बढी लगानी भएको छ।

सार्दिखोलाको भराभरीस्थित सेती नदीमा बाँध निर्माण गरी ६ हजार ४०० मिटर लामो भूमिगत पाइपमार्फत पानी ल्याएर १८७ मिटर उचाइबाट चिन्तेबगरमा रहेको पावरहाउसमा त्यसलाई खसालेर विद्युत् उत्पादन गरिएको हो। आयोजना जलप्रवाहमा आधारित छ।