राष्ट्रपतिको स्वास्थ्यमा सुधार

काठमाडौँ– राष्ट्रपति रामचन्द्र पौडेलको स्वास्थ्यमा सुधार आएको छ। 

राष्ट्रपति पौडेल प्रोस्टेटसम्बन्धी उपचारका लागि त्रिभुवन विश्वविद्यालय शिक्षण अस्पताल महाराजगन्जमा मंसिर १९ गते भर्ना भएका थिए। राष्ट्रपति पौडेलको आधुनिक प्रविधिबाट शल्यक्रिया गरिएको थियो। 

हाल उनको अवस्था सुधारोन्मुख र सामान्य रहेको अस्पतालले जनाएको छ। अस्पतालका निमित्त कार्यकारी निर्देशक प्राडा. घनश्याम गुरुङद्वारा जारी विज्ञप्तिमा राष्ट्रपति पौडेलको स्वास्थ्यमा सुधार आएको उल्लेख छ। 

राष्ट्रपतिको स्वास्थ्य अवस्था बुझ्न प्रधानमन्त्री अस्पतालमा
प्रधानमन्त्री केपी शर्मा ओलीले महाराजगन्जस्थित शिक्षण अस्पताल पुगेर राष्ट्रपति पौडेलको स्वास्थ्य अवस्थाबारे जानकारी लिएका छन्।

प्रधानमन्त्री ओलीले राष्ट्रपति पौडेलको शीघ्र स्वास्थ्य लाभको कामना गर्दै उपचारमा आवश्यक सबै प्रबन्ध गर्न सम्बन्धित अधिकारी र चिकित्सकलाई आग्रह गरे।

केही दिनदेखि अस्पतालमा उपचाररत राष्ट्रपति पौडेलको उपचारमा संलग्न चिकित्सकसँग प्रधानमन्त्री ओलीले उपचारको सम्पूर्ण विवरणबारे जानकारी लिएका थिए।