कैलालीबाट १ करोडभन्दा बढीको सुनचाँदी र नगदसहित ३ जना पक्राउ

काठमाडौँ– कैलालीबाट १ करोडभन्दा बढीको सुनचाँदी र नगदसहित शनिबार तीन जना पक्राउ परेका छन्। भजनि नगरपालिका- ५ स्थित कौवाखेडा सीमा क्षेत्रबाट उनीहरूलाई सशस्त्र प्रहरी बलले  नियन्त्रणमा लिएको हो। 

पक्राउ पर्नेमा सुर्खेतको चौकुनी गाउँपालिका-१० का ३६ वर्षीय महेन्द्रबहादुर शाही, वीरेन्द्रनगर नगरपालिका-१ का ३१ वर्षीय हर्कबहादुर बिक र पञ्चपुरी नगरपालिका-११ का ३२ वर्षीय महेश सुनार छन्।

भारतबाट नेपालतर्फ आउँदै गरेका उनीहरूको साथबाट प्रहरीले ८० लाख ७९ हजार ५६१ रुपैयाँ बराबरको ६२० ग्राम सुन, १५ लाख २८ हजार ४६० रुपैयाँ बराबरको ८ किलो ९१४ ग्राम चाँदी, ६ लाख ११ हजार ६२५  भारतीय रुपैयाँ, साउदी रियाल, चार  थान मोबाइल सेट र चाँदीका लेप लगाएका भाँडाकुँडा बरामद गरेको छ। 

यी सामानको स्रोत नखुलेपछि आवश्यक कारबाहीका लागि सम्बन्धित निकायमा बुझाइएको सशस्त्र प्रहरी बलका सहप्रवक्ता डीएसपी शैलेन्द्र थापाले जानकारी दिए।