महिला यू–१९ एशिया कपः पाकिस्तानलाई हराउँदै सेमिफाइनलमा पुग्यो नेपाल

लगातारको दोस्रो हारसहित पाकिस्तान प्रतियोगिताबाट बाहिरिएको छ। पाकिस्तान पहिलो खेलमा भारतसँग ९ विकेटले पराजित भएको थियो।

उकालो

सोमबार, १ पुष, २०८१

महिला यू–१९ एशिया कपः पाकिस्तानलाई हराउँदै सेमिफाइनलमा पुग्यो नेपाल

काठमाडाैँ– नेपाल एसीसी यू–१९ महिला एशिया कपको सेमिफाइनलमा प्रवेश गरेको छ। मलेसियामा जारी खेलमा पाकिस्तानलाई ६ विकेटले हराउँदै नेपाली टोली सेमिफाइनलमा पुगेको हो।

पाकिस्तानले दिएको १०५ रनको लक्ष्य नेपालले १९ ओभरमा ४ विकेट गुमाएर पूरा गर्‍यो। कप्तान पूजा महतोले सर्वाधिक ४७ रन जोडिन्।

मलेसियाको क्वालालम्पुरस्थित बायुमास ओभल क्रिकेट मैदानमा टस जितेर पहिले ब्याटिङ रोजेको पाकिस्तानले निर्धारित २० ओभरमा ५ विकेटको क्षतिमा १०४ रन बनाएको थियो। पाकिस्तानका लागि कोमल खानले सर्वाधिक ३८ रन बनाएकी थिइन्। बलिङतर्फ नेपालका लागि पूजा महतोले २ तथा रचनाकुमारी चौधरी, रिया शर्मा र सिमाना केसीले १/१ विकेट लिएका थिए।

लगातारको दोस्रो हारसहित पाकिस्तान प्रतियोगिताबाट बाहिरिएको छ। पाकिस्तान पहिलो खेलमा भारतसँग ९ विकेटले पराजित भएको थियो। अब नेपालले मंगलबार भारतसँग खेल्नेछ।

प्रतिक्रिया दिनुहोस !