एनपीएल: जनकपुरलाई ८ विकेटले हराउँदै सुदूरपश्चिम फाइनलमा प्रवेश

काठमाडौँ– नेपाल प्रिमियर लिग (एनपीएल)मा जनकपुर बोल्ट्सलाई ८ विकेटले पराजित गर्दै सुदूरपश्चिम रोयल्स फाइनलमा प्रवेश गरेको छ।

त्रिवि मैदानमा बुधबार भएको पहिलो क्वालिफायर खेलमा जनकपुरले दिएको १४० रनको लक्ष्य सुदूरपश्चिमले १८.३ ओभरमा २ विकेट गुमाएर पूरा गर्‍यो। सुदूरपश्चिमको जितमा विनोद भण्डारीले सर्वाधिक ५८ रन जोडे। उनले ५५ बलमा ३ चौका र ३ छक्का प्रहार गरे। यस्तै, सेफ अलि जेबले २१ बलमा ३ चौका र २ छक्काको सहयोगमा ३२ रन बनाए। ब्रेन्डन मक्मुलनले १९ बलमा १ चौका र १ छक्काको सहयोगमा २५ रन जोडे। कप्तान दीपेन्द्रसिंह ऐरीले १६ बलमा १ चौका र १ छक्काको सहयोगमा २० रन बनाउँदै नटआउट रहे।

जनकपुरका लागि किशोर महतो र ललितनारायण राजवंशीले समान १/१ विकेट लिए।

त्यसअघि टस जितेर पहिले ब्याटिङ गरेको जनकपुरले निर्धारित २० ओभरमा ८ विकेट गुमाएर १३९ रनको योगफल तयार गरेको थियो। जनकपुरका लागि जेम्स निसमले सर्वाधिक ४५ रन जोडे। त्यस्तै शुभ कंशाकारले २४ बलमा २६ रन जोडे। लाहिरु मिलन्था र हर्ष ठोकरले समान १२/१२ रन जोडे भने आसिफ शेख र अरनिको यादवले समान ११/११ रन बनाएका थिए।

बलिङतर्फ सुदूरपश्चिमका कप्तान ऐरीले तीन विकेट लिए भने सैफ जैबले दुई विकेट लिए। त्यस्तै स्कट कुगेलेइन र अविनाश बोहराले समान एक/एक विकेट लिए।

लिग चरणको खेलमा समेत सुदूरपश्चिमले जनकपुरलाई पराजित गरेको थियो। अब जनकपुरले फाइनल प्रवेशका लागि बिहीबार हुने दोस्रो क्वालिफायरमा इलिमिनेटरको विजेता कर्णाली याक्ससँग खेल्नेछ।