अफगानिस्तानमा बस दुर्घटना: कम्तीमा ५२ जनाको मृत्यु

अफगानिस्तानको मध्य भागको दुई छुट्टाछुट्टै स्थानमा भएको दुर्घटनामा ५२ जनाको मृत्यु भएको छ। 

दुर्घटनामा ६५ जना घाइते भएको तालिबान सरकारले जनाएको छ। उक्त दुर्घटना राजधानी काबुल र दक्षिणी कान्दाहार शहरको बीचमा रहेको गजनी प्रान्तमा बुधबार राति भएको प्रान्तीय सूचना तथा संस्कृति प्रमुख हमिदुल्लाह निसारले बताए। 

मध्य गजनीको शाहबाज गाउँ नजिकै एउटा बस इन्धन ट्यांकरसँग ठक्कर खाँदा  दुर्घटना भएको थियो। अर्को बस पूर्वी जिल्ला अन्दरमा एउटा ट्रकसँग ठोक्किएको निसारले बताए। 

उद्धार टोली घटनास्थलमा पुगेको र घाइतेलाई अस्पताल पुर्‍याएको र केहीको अवस्था गम्भीर रहेको उनले जानकारी दिए। 

दशकौँ लामो द्वन्द्व खेपेको अफगानिस्तानमा कमजोर सडक, राजमार्गमा तीव्र गतिमा गुड्ने सवारी साधन र नियमनको अभावका कारण अफगानिस्तानमा सवारी दुर्घटना हुने गरेको छ।