१० वर्षअघि हराएको एमएच ३७० विमानको खोजी पुनः थाल्न मलेसिया सहमत

मलेसियाको मन्त्रिपरिषद् १० वर्षअघि रहस्यमय तरिकाले हराएको मलेसिया एयरलाइन्सको विमान एमएच ३७० को पुनः खोजी शुरू गर्ने प्रस्तावमा सहमत भएको मलेसियाका यातायातमन्त्रीले शुक्रबार बताएका छन्। 

सन् २०१४ को मार्च ८ मा क्वालालम्पुरबाट बेइजिङ जाँदै गर्दा २३९ जना यात्रु बोकेको बोइङ ७ राडार स्क्रिनबाट हराएको थियो। उड्डयन इतिहासमा सबैभन्दा ठूलो खोजीका बाबजुद विमान अहिलेसम्म फेला परेको छैन।

डिसेम्बर १३ मा सरकारले ‘दक्षिणी हिन्द महासागरमा अनुमानित १५ हजार वर्ग किलोमिटरमा अनुमानित नयाँ क्षेत्रमा खोजी कार्य अगाडि बढाउन’ संयुक्त राज्य अमेरिका र संयुक्त अधिराज्यमा आधारित कम्पनी ओसियन इन्फिनिटीको प्रस्तावलाई स्वीकार गर्न मलेसियाले सैद्धान्तिक सहमति दिएको यातायातमन्त्री एन्थोनी लोकेले बताए।

“ओसियन इन्फिनिटीद्वारा खोजी अभियानको प्रस्ताव एक ठोस प्रस्ताव हो र विचारयोग्य छ,” लोकेले पत्रकार सम्मेलनमा भने। 

सन् २०२५ को शुरूमा अन्तिम रूप दिने आशा गरिएको हाल सम्झौताका शर्तहरूमा छलफल गरिरहेको यातायात मन्त्रालयले जनाएको छ। 

“नयाँ खोजी ‘नो फाइन्ड, नो फी’को सिद्धान्तमा आधारित हुनेछ, जसमा मलेसियाली सरकारले ओसियन इन्फिनिटीलाई विमान फेला पारे वा नपारे पनि कुनै पनि रकम तिर्ने छैन”, लोकेले भने। 

सरकारले यसअघि सन् २०१८ मा ओसियन इन्फिनिटीलाई विमानको खोजीका लागि खटाएको थियो तर कुनै परिणाम आएको थिएन।

सन् २०१४ मा विमान हराएपछि अस्ट्रेलियाको नेतृत्वमा हिन्द महासागरमा एक लाख २० हजार वर्ग किलोमिटर (४६ हजार वर्ग माइल) क्षेत्रमा गरिएको खोजी अभियानले विमानको कुनै पनि अंश फेला पार्न सकेको थिएन। यो खोजी अभियान जनवरी २०१७ मा स्थगित गरिएको थियो, त्यसपछि ओसियन इन्फिनिटीले पहिलो पटक खोजी गरेको थियो।