सिरहामा गहुँखेतीका लागि रासायनिक मल अभाव

सिरहा– सिरहाको सखुवानन्कारकट्टी गाउँपालिका–१ का बद्री यादवले रासायनिक मल अभाव हुँदा गहुँ छर्न पाएका छैनन्। कृषि सामग्री कम्पनी लिमिटेड शाखा कार्यालय लहानले गत मङ्सिरमा तीन चरणमा रासायनिक मल वितरण गरेको थियो। सरकारले उपलब्ध गराउँदै आएको सहुलियतको उक्त मल यादवले भने पाउन सकेनन्। 

यादवले धान थन्क्याएलगत्तै करिब पाँच कट्ठा जग्गामा गहुँ छर्ने तयारी गरेका थिए। गहुँबालीका लागि खेत जोतेर तयार पारिसक्दासमेत उनले युरिया र डीएपी मल किन्न पाएनन्। सोमबार पनि उनी मल लिन लहानस्थित कृषि सामग्री कम्पनी लिमिटेडको शाखा कार्यालय पुगे। “खेती लगाउने समय घर्किसक्यो, कतैबाट पनि मल किन्न पाइएन। यहाँ त पाइन्छ कि भनेर आएको हुँ”, कृषक यादवले भने, “तर यहाँबाट पनि मल पाउन सम्भव भएन।” 

कृषि सामग्री कम्पनी लिमिटेडले किसानलाई प्रत्यक्ष रूपमा मल दिन नमिल्ने र यसका लागि रासायनिक मल वितरण गर्ने सहकारी धाउनुपर्ने यादवले बताए। उनी रित्तै घर फर्किए। अनुदानको मल मारमा समेत मल अभावले किन्न नपाएको यादवको गुनासो छ। 

यादवको जस्तै सिरहाका १७ वटै पालिकाका अधिकांश किसानले मल पाउन सकेका छैनन्। कतिपयले मल अभावका कारण गहुँ छर्न पाएका छैनन्। कतिपयले उम्रिएको गहुँमा मल छर्न सहकारी तथा अन्यत्र भौँतारिरहेका भेटिन्छन्। तर मल सहजै पाइँदैन। भेटिए पनि चर्को मूल्य तिर्नुपर्छ। स्थानीय तहको सिफारिसअनुसार सहकारीमार्फत पाउनुपर्ने मल पनि किसानले पाउन सकेका छैनन्। 

किसानका लागि रासायनिक मल एकदमै न्यून मात्रामा प्राप्त भएको लहान नगरपालिका–२ का वडाध्यक्ष सियाराम यादवले बताए। मागको करिब एक तिहाइ मात्रामा रासायनिक मल उपलब्ध भएकाले अहिले मलको हाहाकार भएको उनले जानकारी दिए। किसानलाई दिइने मलको कोटा बढाउन वडाध्यक्ष यादवले सरकारसँग माग गरे।

भारत तथा तेस्रो मुलुकबाट सरकारले खरिद गरेर ल्याएको रासायनिक मल कृषि सामग्री कम्पनी लिमिटेड र साल्ट ट्रेडिङ कर्पोरेसनले कृषि सहकारी संस्थामार्फत किसानलाई अनुदानमा उपलब्ध गराउँदै आएको छ। स्थानीय तहमा त्यहाँका उपप्रमुख तथा उपाध्यक्षको नेतृत्वमा मल खाद्य आपूर्ति समितिको सिफारिसमा कृषि सहकारी डिलरबाट किसानलाई रासायनिक मल वितरण हुँदै आएको छ।

सिरहामा १७ वटै पालिकामा गरी १२० कृषि सहकारी डिलर रहेका छन्। यसबाटै किसानलाई रासायनिक मल वितरण गरिँदै आएको कृषि सामग्री कम्पनी लिमिटेडको शाखा कार्यालय लहानका प्रमुख दीपराज पौडेलले बताए। उनका अनुसार सरकारले नै न्यून मात्रामा उपलब्ध गराएकाले अहिले मल अभाव भएको हो। 

सिरहामा ६ हजार ४०० हेक्टर खेतीयोग्य जमिन छ। त्यसमध्ये झन्डै ७५ प्रतिशतमा गहुँखेती हुने गर्छ। यसका लागि कम्तीमा चार हजारदेखि चार हजार ५०० मेट्रिक टन डीएपी मल र तीन हजार मेट्रिक टन युरिया मल आवश्यक पर्ने प्रमुख पौडेलले बताए। कार्यालयले मङ्सिरमा तीन चरणमा गरी एक हजार २७२ मेट्रिक टन मात्र डीएपी मल वितरण गरेको उनले जानकारी दिए।  पहिलो चरणमा ८७२ मेट्रिक टन डीएपी र एक हजार मेट्रिक टन युरिया, दोस्रो चरणमा तीन सय मेट्रिक टन डीएपी र त्यति नै मात्रामा युरिया तथा तेस्रो चरणमा १०० मेट्रिक टन डीएपी र सोही मात्रामा युरिया वितरण गरिएको थियो।

प्रमुख पौडेलले अझै ८५० मेट्रिक टन डीएपी मल आयात गरिने बताए। यहाँबाट वितरण गरिने डीएपी मल प्रतिबोरा दुई हजार २७२ रुपैयाँ ५० पैसा, युरिया प्रतिबोरा ८२२ रुपैयाँ ५० पैसा र पोटास एक हजार ५७२ रुपैयाँ तोकिएको छ। धान, मकै, गहुँजस्ता प्रमुख खाद्यान्न बाली लगाउने मौसममा सधैँ रासायनिक मल अभाव हुँदा देशको अर्थतन्त्रमा समेत प्रतिकूल प्रभाव पारिरहेको छ।