सिरियाको टार्टस प्रान्तमा भएको झडपमा १७ जनाको मृत्यु

सिरियाको टार्टस प्रान्तमा बुधबार भएको झडपमा १७ जनाको मृत्यु भएको छ। सुरक्षा बलले अपदस्थ नेता बसर अल–असदको नेतृत्वका एक अधिकारीलाई पक्राउ गर्न खोजेपछि झडपमा भएको थियो। 

सिरियन अब्जर्भेटरी फर ह्युमन राइट्सका अनुसार सामान्य सुरक्षा बलका १४ सदस्य र तीन सशस्त्र व्यक्तिको मृत्यु भएको छ। यसले पहिलेको नौ जनाको मृत्युको संख्यालाई बढाएको छ।

सुरक्षा बलले सैदनाया जेल अपराधका जिम्मेवारमध्ये एक अधिकारीलाई पक्राउ गर्न खोजेको अब्जर्भेटरीले बताएको छ। गृहमन्त्री मोहम्मद अब्देल रहमानले उक्त घटनामा अन्य १० जना घाइते भएको बताए।

हयात तहरीर अल–शाम (एचटीएस) को नेतृत्वमा विद्रोहीले असदलाई हटाएपछि सिरियाका जेलका ढोका खोलिएका थिए। 

अब्जर्भेटरीले वाञ्छित व्यक्ति मोहम्मद कान्जो हसन रहेको जनाएको छ। जसले सैन्य न्याय विभागको निर्देशक र फिल्ड कोर्टको प्रमुखको पद सम्हालेका थिए। उनले हजारौँ कैदीविरुद्ध मृत्युदण्ड र स्वेच्छाचारी फैसला गरेको बताइएको छ।

असदको अलावी अल्पसंख्यकको गढ टार्टस प्रान्तमा धेरै बासिन्दाले आफ्नो घर खोजी गर्न अनुमति दिन अस्वीकार गरेपछि झडप भएको थियो।