सर्वोच्च अदालतका पूर्वन्यायाधीश प्रकाश वस्तीको निधन

काठमाडौँ– सर्वोच्च अदालतका पूर्वन्यायाधीश प्रकाश वस्तीको ७१ वर्षको उमेरमा निधन भएको छ। वस्तीका साइँलो भाइ अधिवक्ता गजेन्द्र वस्तीकाअनुसार उनको शुक्रबार बेलुका ६ बजे थापाथलीस्थित नर्भिक अस्पतालमा उपचारका क्रममा निधन भएको हो। 

उनलाई हृदयाघात भएपछि उपचारका लागि अस्पताल लगिएको थियो। वस्तीका छोरा डा. प्रणव वस्ती अमेरिकामा रहेको र आएपछि आइतबार पशुपति आर्यघाटमा अन्त्येष्टि गर्ने परिवारको तयारी छ। वस्तीको शव अस्पतालमै राखिएको छ। उनका श्रीमती, एक छोरा र तीन छोरी छन्। 

पूर्वन्यायाधीश वस्तीले करिब ६ वर्ष सर्वोच्च अदालतको अतिरिक्त न्यायाधीशका रूपमा काम गरेका थिए। २०६५ साल भदौ २२ गते न्यायाधीश नियुक्त भएका उनी २०७० चैत २९ मा अवकाश भएका थिए। 

सर्वोच्च अदालतबाट अवकाश भएपछि उनले ६ वर्ष मानवअधिकार आयोगको सदस्य भए। अवकाश जीवन बिताइरहेका वस्ती न्याय र कानूनको क्षेत्रमा अध्ययन, अनुसन्धान एवं पुस्तक लेखनमा संलग्न थिए।

गोरखा खोपलाङमा २०१० असार ८ गते जन्मिएका वस्ती २०३३ सालदेखि कानून व्यवसायमा प्रवेश गरेका थिए। २०६५ सालमा वरिष्ठ अधिवक्ता भएका उनको भ्रष्टाचार नियन्त्रण, देवानी कानून एवं कानूनी प्रणालीको विकासक्रमका विषयमा रुचि थियो।