रोङमा ब्रान्डिङ गरेर तितेकरेलाको बिक्री

इलाम– रोङ गाउँपालिकाका किसान तितेकरेलाको खेतीतर्फ आकर्षित भएका छन्। किसानले उत्पादन गरेका तितेकरेलालाई गाउँपालिकाले ‘ब्रान्डिङ’ गरेर बिक्री गरिदिन थालेपछि किसानले यसको खेती बढाएका छन्। 

रोङ–४ का रघुनाथ अर्यालले गत वर्षसम्म घरमा उपभोग गर्नका लागि मात्र तितेकरेला लगाउने गरेका थिए। अहिले पालिकाले बजारीकरण गर्न थालेपछि भने व्यावसायिक रूपमा खेती थालेको उनले बताए।  अर्यालले यसवर्ष पाखाबारीमा करेलाको एक हजार बिरुवा रोपेका छन्। “तरकारीका रूपमा बिक्री नभए पनि स्थानीय सरकारले किनिदिने भएपछि ढुक्कसँग खेती थालेका छौँ,” उनले भने। 

अधिकांश किसान यो खेतीतर्फ आकर्षित भएका छन्। गाउँपालिकाले करेलालाई सुकाएर सुकुटीका रूपमा प्रशोधन गरी बिक्री शुरू गरेको छ। “यस वर्ष बिक्रीका लागि २०० किलो सुख्खा तितेकरेला तयार छ,” गाउँपालिका अध्यक्ष मणिकुमार स्याङ्बोले भने, “एक पटकमा ५० हजार किलो काँचो करेला प्रशोधन गर्न सक्ने उद्योग निर्माण भइरहेको छ।”

गाउँपालिकाका अध्यक्ष स्याङ्बोले बेमौसममा पनि उपभोक्ताको आवश्यकतालाई ध्यानमा राखेर तितेकरेलालाई सुकाएर प्याकेजिङ गरी बजारमा ल्याउने तयारी भइरहेको जानकारी दिए। करेलाको अध्ययन, अनुसन्धान गर्दा सफल भएपछि पालिकाले बजारीकरण थालेको उनको भनाइ छ। 

तितेकरेलालाई गुन्द्रुकसँग मोलेर अचारका रूपमा पनि खान सकिन्छ। प्याकेजिङ भएको तितेकरेलालाई तातोपानीमा पाँच-१० मिनेट भिजाएर पुरानै स्वरूप तथा स्वादमा विभिन्न तरिकाले पकाएर खान सकिने किसान बताउँछन्। 

रोङ गाउँपालिकाका सबै स्थानमा उत्पादन गर्न सकिने करेला पालिकाले प्रशोधन गरेर बजारीकरणमा लागेपछि यसको खेतीमा किसानको उत्साह बढेको करेला खेती गर्दै आएका रोङ–३ प्यूरेका लल्मी लाप्चाले बताए। 

गाउँपालिकाले यसअघि रोङमा गुन्द्रुक, सिस्नो, बेसार, मह, चिया, कुचोलगायत कृषिजन्य वस्तुको ब्रान्डिङ गरी बजारीकरण गरिरहेको छ। गाउँपालिका उपाध्यक्ष विष्णुमाया भुजेलका अनुसार रोङको गुन्द्रुक र महको माग बजारमा बढी भएकाले माग अनुसार आपूर्ति गर्न कठिन भइरहेको छ।