मधेशमा हुस्सु र शीतलहर: महोत्तरीका ५ पालिकामा विद्यालय बिदा

तराई मधेशमा विगत दुई–तीन दिनदेखि शीतलहर र चिसो हावा चल्न थालेपछि चिसोले जनजीवन प्रभावित बनेको छ।

उकालो

बुधबार, २४ पुष, २०८१

मधेशमा हुस्सु र शीतलहर: महोत्तरीका ५ पालिकामा विद्यालय बिदा
तस्वीर: रासस

जलेश्वर– विगत तीन दिनदेखि एक्कासि जाडो बढेपछि जिल्लाका पाँच वटा पालिकाले आफ्नो नगरभित्रका विद्यालय बन्द गरेका छन्।

सदरमुकाम रहेको जलेश्वर र मनरासिस्वा नगरपालिका तथा पिपरा, सोनमा र एकडारा गाउँपालिकाले जाडोका कारण पठनपाठन सञ्चालन गर्न असहज भएको भन्दै बुधबारदेखि लागू हुनेगरी एक साताका लागि नगरभित्रका विद्यालय बन्द गरेका हुन्।

जलेश्वर, मनरासिस्वा, सोनमा र पिपरा गाउँपालिकाले बुधबारदेखि पुस २९ र एकडारा गाउँपालिकाले माघ १ सम्म विद्यालय बन्द गरेको विज्ञप्तिमार्फत जनाएका छन्। 

बालबालिका अत्यधिक जाडोका कारण प्रभावित हुन थालेपछि १० नगरपालिका र पाँच गाउँपालिका रहेका महोत्तरीका पाँच वटा पालिकाले बर्खे बिदाबाट कट्टा हुनेगरी जाडो बिदा दिँदै नगरभित्रका विद्यालयमा पठनपाठन बन्द भएको जनाएका छन्। 

तराई मधेशमा विगत दुई–तीन दिनदेखि शीतलहर र चिसो हावा चल्न थालेपछि चिसोले जनजीवन प्रभावित बनेको छ। जाडोका कारण बालबालिका र वृद्धवृद्धा बढी प्रभावित भएका छन्। 

प्रतिक्रिया दिनुहोस !