तोलामा १ हजार ६०० रुपैयाँले बढ्यो सुनको मूल्य

काठमाडौँ– अन्तर्राष्ट्रिय बजारमा सुनचाँदीको मूल्यमा सामान्य वृद्धि भएसँगै त्यसको प्रभाव स्थानीय बजारमा पनि परेको छ। 

शुक्रबारको तुलनामा छापावाल सुन तोलामा १ हजार ६०० रुपैयाँले वृद्धि भएको हो। सोही परिमाणको चाँदी पनि तोलामा १५ रुपैयाँले बढेको नेपाल सुनचाँदी व्यवसायी महासंघले जनाएको छ। 

महासंघका अनुसार एक तोला सुन आइतबार १ लाख ५५ हजार ७०० रुपैयाँमा कारोबार भएको छ। सोही परिमाणको चाँदीको मूल्य १ हजार ८६० रुपैयाँ कायम भएको छ। 

अन्तर्राष्ट्रिय बजारमा आइतबार एक औँस सुनको मूल्य २ हजार ७०४ अमेरिकी डलर निर्धारण भएसँगै नेपालमा पनि त्यसको प्रभाव परेको हो। शुक्रबार सोही परिमाणको पहेँलो धातु २ हजार ६८१ डलरमा कारोबार भएको थियो।