बाँकेमा चिसो बढेपछि जनजीवन प्रभावित

खजुरा– पश्चिम तराईमा चिसो बढेपछि जनजीवन प्रभावित बनेको छ। बाँकेको नेपालगन्ज, कोहलपुर, खजुरा, नरैनापुरलगायत क्षेत्रमा चिसोले जनजीवन कष्टकर बनेको हो। ती क्षेत्रमा बिहानैदेखि शीतलहर, बाक्लो हुस्सुले गर्दा जिल्लामा चिसो बढेको छ। 

“चिसोले बजार तथा सहरी क्षेत्रमा चहलपहल घटेको छभने सडकमा सवारीसाधन कम चलेका छन्। नेपालगन्जमा बिहान दुई घण्टासम्म शीतलहर चल्ने गरेको छ। बिहानैदेखि हुस्सुले अत्यधिक चिसो भएको छ,” स्थानीय रामसुहावन यादवले भने, “चिसोले गर्दा घरभन्दा बाहिर निस्कन सकिएको छैन।” 

चिसोले ज्यालादारी काम गर्ने बढी मारमा परेका छन्। उनीहरू काममा जान नपाएको बाँके डुडुवा गाउँपालिका–४ का मजदुर रामदिन गोडियाले बताए। “काम नगर्दा परिवार चलाउन मुस्किल पर्छ, केही दिन यस्तै चिसो रह्यो भने समस्या हुने देखिन्छ,” उनले भने।

दैनिक ज्यालादारी काम गर्न पहाड तथा भारतीय सीमावर्ती क्षेत्रबाट तराईका जिल्लामा सर्वसाधारण झर्ने गर्छन्। दिनभरि एकपटक पनि घाम नलाग्दा काममा जान सक्ने अवस्था नभएको अर्का मजदुर बालकराम गोडियाले बताए। आगो बालेर नागरिकले न्यानो लिइरहेका छन्। “घरभन्दा बाहिर जान सक्ने अवस्था भएन,” उनले भने, “त्यसैले घरमा आगो तापेर बसेको छु।”

चिसोबाट विशेषगरी विद्यार्थी, मजदुर, बालबालिका, गरिब असहाय, ज्येष्ठ नागरिक बढी प्रभावित भएका छन्। चिसोकै कारण बिरामीसमेत बढेका छन्। चिसोसँगै दम, निमोनिया, रुघाखोकी, ज्वरोलगायत रोगका बिरामी बढेका हुन्।

भेरी अस्पतालमा बालबालिका, वृद्धवृद्धा, मुटु, मिर्गौला, फोक्सो, मधुमेह तथा अन्य दीर्घरोगी चिसोले बढेको अस्पतालका सूचना अधिकारी डा. संकेत रिसालले बताए। चिसोले गर्दा बालबालिका, दीर्घरोगीका बिरामीलाई समस्या बनाएको छ।