जो जहाँ छ, त्यहीँबाट मतदान गर्न पाउनुपर्छ : दिनेश कुमार थपलिया

काठमाडौँ- प्रमुख निर्वाचन आयुक्त दिनेश कुमार थपलियाले मतदाताले आफू बसिरहेकै ठाउँबाट मतदान गर्न पाउने गरी कानून बनाउनुपर्ने बताएका छन्। 

बिहीबार काठमाडौँमा आयोजित एक कार्यक्रममा बोल्दै प्रमुख निर्वाचन आयुक्त थपलियाले आम मतदाताहरूले आफू बसिरहेकै ठाउँबाट मतदान गर्न पाउनेगरी कानून बनाउनुपर्ने बताएका हुन्। 

उनले अन्तिम मतदाता नामावलीमा नाम प्रकाशित भएका मतदाताले अस्थायी बसोबास भएको ठाउँबाट पनि समानुपातिक निर्वाचन प्रणाली अन्तर्गत मतदान गर्न पाउनुपर्ने बताए। 

कर्मचारी र कैदीबन्दीलाई यसैपटक समानुपातिकमा मतदान गर्न दिइएको उल्लेख गर्दै आगामी दिनमा कानून बनाएर आम मतदाताका लागि पनि यस्तो व्यवस्था गर्नुपर्ने उनको भनाइ थियो। यस्तो व्यवस्था गर्न सकेमा मतदाताको संख्या बढ्ने उनले बताए। 

“अब बन्ने कानूनमा त्यो व्यवस्था गर्नुपर्छ भन्ने मेरो बुझाइ छ”, उनले भने, “नेपालभित्र अन्तिम मतदाता नामावलीमा नाम भएको कुनैपनि व्यक्तिले कम्तीमा पनि समानुपातिक तर्फबाट भोट हाल्न पाउने कुराको ग्यारेन्टी गर्नेगरी कानून बनाउनुपर्छ।”

एक अर्को प्रसंगमा प्रमुख निर्वाचन आयुक्त थपलियाले जनअनुमोदित राजनीतिक दलहरूलाई मात्रै सर्वदलीय बैठकहरूमा समावेश गराउने प्रावधान राख्नेगरी आयोगले निर्णय गर्न लागेको बताए। 

उनले जिल्लामा सर्वदलीय बैठक राख्नुपरेमा सो जिल्लामा पार्टीको जिल्ला समितिको विवरण पेश गरेको, प्रतिनिधिसभा, प्रदेशसभा र स्थानीय तहमा प्रतिनिधित्व गरेको दलहरूलाई मात्रै बोलाउन आफूले निर्देशन दिएको बताए। 

दल दर्ता गर्नु उपलब्धि नभएको भन्दै उनले जनताद्वारा अनुमोदित हुनु र वैधता सिर्जना गर्नु ठूलो कुरा भएको बताए।

त्यस्तै, उनले आयोगले समावेशिता र लैंगिक समानतालाई महत्त्व दिएर निर्वाचन कानून तयार गरिरहेको बताए।