पाँचपोखरी क्षेत्रबाट ५ क्विन्टल फोहोर संकलन

सिन्धुपाल्चोक– पर्यटकीयस्थल पाँचपोखरीको सरसफाइ अभियानबाट पाँच क्विन्टल फोहर संकलन गरिएको छ। कुहिने र नकुहिने फोहोर छुट्टाछुट्टै जम्मा गरिएको सरसफाइमा संलग्न हर्क तामाङले बताए। 

उक्त फोहोर भरियामार्फत भोताङको फोहर संकलन केन्द्रमा ल्याइएको छ। ‘पर्यटन प्रवद्र्धनमा हाम्रो दृष्टि, सफा राखौँ आफ्नो सृष्टि’ नाराका साथ मंगलबारदेखि पाँचपोखरी थाङ्पाल गाउँपालिकाको भोताङबाट सरसफाइ अभियान थालिएको थियो।

पाँचपोखरी नेपाल भ्रमण वर्ष २०२० मा घुम्नैपर्ने पर्यटकीयस्थलको सूचीमा समेत परेको गाउँपालिकाका अध्यक्ष टासी लामाले जानकारी दिए। यहाँ जनै पूर्णिमाका अवसरमा मेला लाग्ने गरेको छ। भक्तजन तथा पर्यटकले प्लाष्टिक, बोतललगायत अन्य सामग्री जथाभावी फालेपछि वातावरण दुर्गन्धित बनेको थियो।

वातावरण सफा राख्न सरसफाइ अभियान सञ्चालन गरिएको अध्यक्ष लामाले जानकारी दिए।