संयुक्त राष्ट्रसंघीय जलवायु निकायलाई सघाउने ब्लुमबर्गको घोषणा

अमेरिकी राष्ट्रपति डोनाल्ड ट्रम्पले पेरिस सम्झौताबाट फिर्ता हुने घोषणा गरेपछि अर्बपति माइकल ब्लुमबर्गले आफ्नो फाउन्डेसनले संयुक्त राष्ट्र जलवायु परिवर्तन निकायलाई वित्तीय सहयोग गर्ने घोषणा गरेका छन्। 

ब्लुमबर्गको यो घोषणाले जलवायु परिवर्तनसम्बन्धी संयुक्त राष्ट्रसंघीय प्रारूप महासन्धि (यूएनएफसीसीसी) लाई पूर्ण रूपमा सहयोग गर्ने लक्ष्य राखेको छ। अमेरिकाले साधारणतया यूएनएफसीसीसी सचिवालयको बजेटको २२ प्रतिशत योगदान गर्छ। यूएनएफसीसीसीको परिचालन खर्च सन् २०२४/२०२५ मा ८ करोड ८४ लाख युरो अनुमान गरिएको छ।

“सन् २०१७ देखि २०२० सम्म शहर, राज्य, व्यवसाय र सार्वजनिक क्षेत्रले हाम्रो राष्ट्रको प्रतिबद्धतालाई सम्मान गर्न चुनौती स्वीकार गरेका थिए र अब हामी फेरि तयार छौँ,” जलवायु महत्त्वाकांक्षा र समाधानका लागि संयुक्त राष्ट्रसंघका विशेष दूत ब्लुमबर्गले भने। 

सन् २०१७ मा ट्रम्प प्रशासनले पेरिस सम्झौताबाट बाहिरिने घोषणा गरेपछि ब्लुमबर्गले यूएनएफसीसीसीलाई १ करोड ५० लाख डलर दिने वाचा गरेका थिए।  ।

उनले ‘अमेरिकाको प्रतिबद्धता’ नामक पहल पनि शुरू गरेका छन्। यसले संघीय स्तर बाहेकका अमेरिकी जलवायु प्रतिबद्धताको अनुगमन र प्रतिवेदन गर्छ। यसले विश्वलाई अमेरिका अझै पेरिस सम्झौताको पूर्ण पक्ष हो जस्तै प्रगति अनुगमन गर्न सक्षम बनाउने उनको भनाइ छ।