तमोर करिडोरबाट टिपताला पुग्यो गाडी

फुङ्लिङ– चीनको स्वशासित क्षेत्र तिब्बतसँग जोडिएको नेपालको टिप्ताला क्षेत्रमा नेपाली सवारीसाधन सञ्चालनले नयाँ सम्भावनाको ढोका खोलिदिएको छ। तमोर करिडोरको मर्मतपश्चात कच्ची सडकमार्ग हुँदै टिपतालासम्म जिप, ट्याक्टरलगायत सवारीसाधन नियमित रूपमा पुग्न थालेका छन्।   

टिपताला क्षेत्रको सहज पहुँचले पर्यटन प्रवर्द्धनमा सकारात्मक प्रभाव पारेको छ। फक्ताङलुङ गाउँपालिका–७ का वडाध्यक्ष छेतेन शेर्पाका अनुसार सडक मर्मतसँगै अहिले धेरै यात्रु टिपताला क्षेत्र भ्रमण गर्न सवारीमार्फत आउन थालेका छन्। आन्तरिक पर्यटकको आगमन बढेको छ।

फक्ताङलुङ गाउँपालिका–६ लेलेप र ७ ओलाङचुङगोला हुँदै टिप्तालासम्मको खण्डमा खाल्डाखुल्डी पुर्ने, ह्युमपाइप राख्ने र नदी तथा खोल्साका भागलाई मर्मत गरिएपछि सवारी सञ्चालन सम्भव भएको हो। फुङ्लिङबाट टिपताला पुगेर फर्किने यात्रा अब तीन दिनमा सम्भव भएको छ। ताप्लेजुङ उद्योग वाणिज्य संघका अध्यक्ष नारायण थापाको नेतृत्वमा गएको व्यवसायीको टोलीले तीन दिनमा फुङ्लिङ–टिप्ताला ओहोरदोहोर गरेको छ। अध्यक्ष थापाका अनुसार यो खण्डमा नियमित व्यापारिक गतिविधि सञ्चालन गर्न सकिने सम्भावना बढेको छ। पानी र हिलोको समस्या केही ठाउँमा भए पनि समग्र यात्रा सहज छ। 

ओलाङचुगोलासम्म नियमित यातायात सञ्चालन भएसँगै आवश्यक सामग्री ढुवानी गर्न हुने ठूलो खर्च जोगिएको छ। वडाध्यक्ष शेर्पाका अनुसार तमोर नदीमा पुल नभएकाले सुक्खा मौसममा मात्र सवारीसाधन सञ्चालन सम्भव छ। “सुकेपानी, जोंगिन र फेदी क्षेत्रमा पुल बनेपछि सधैँभरि गाडीमा टिपताला पुग्न सम्भव हुनेछ,” उनले भने।  

फक्ताङलुङ गाउँपालिकाका अध्यक्ष राजन लिम्बूका अनुसार सुकेपानीमा बेलिब्रिज निर्माणका लागि ठेक्का प्रक्रिया अघि बढिसकेको छ। जोंगिन र ओलाङचुङगोलाका क्षेत्रमा मोटर गुड्ने पुल निर्माण भएमा टिपताला क्षेत्र पर्यटन र व्यापारको केन्द्रबिन्दु बन्न सक्छ। तिब्बतको डिङ्जी काउन्टी सरकार र ताप्लेजुङका सुरक्षा अधिकारीबीच भएको बैठकले पनि यस क्षेत्रमा थप अवसर सिर्जना गर्न सक्ने संकेत गरेको छ।

तिब्बत सरकारले टिपतालाबाट फुङ्लिङसम्मको सडक कालोपत्र गरिदिन इच्छुक रहेको जनाएको छ। ताप्लेजुङका प्रमुख जिल्ला अधिकारी नेत्रप्रसाद शर्माका अनुसार सरकार–सरकार सहकार्यमार्फत प्रस्ताव आएमा तिब्बतले सडक कालोपत्र गर्ने वचन दिएको छ। 

टिपतालासम्म सवारीसाधन सञ्चालनले ताप्लेजुङका दुर्गम क्षेत्रको विकास र सम्भावनालाई उजागर गरेको छ। सडक मर्मत, पुल निर्माण र अन्तरदेशीय सहकार्यले यो क्षेत्र पर्यटन र व्यापारिक केन्द्रका रूपमा स्थापित हुने अपेक्षा गरिएको छ।