शीतलहरबाट दलित मुसहर परिवार समस्यामा

बरहथवा– चिसो र शीतलहरको जोखिममा यहाँका विपन्न दलित मुसहर परिवार परेका छन्। अत्यधिक चिसोले मुसहर परिवार केही दिनयता समस्यामा परेका हुन्। 

बसवरिया गाउँपालिका–३ नाकैमा मुसहर माझी बस्ती छ। उक्त बस्तीमा झण्डै ४५ परिवार मुसहर जसोतसो खरको झुपडीमा जीवन धानिरहेका छन्। अन्य समयमा अवस्था सामान्य भए पनि बर्सातको डुबान र हिउँदको ठन्डीले निकै पिरोल्छ। यस बस्तीका बालबालिका र वृद्धवृद्धा निकै सकसपूर्ण जीवन व्यतीत गरिरहेका छन्। 

सोही बस्तीमा १० दिनकी सुत्केरी जोनिता माझी कष्टले दिनरात काटिरहेकी छन्। चिसो दिन प्रतिदिन बढ्दै जाँदा नवजात शिशु र आफूलाई लगाउने न्यानो कपडासमेत नभएको उनले गुनासो गरिन्। खरले छाएको मुस्किलले चार जना टुसुक्क बस्न मिल्ने ठाउँमा पराल ओच्छ्याएर उनले बिस्तरा बनाएकी छन्। त्यसैमा उनको १० दिनको शिशु पनि सुताएकी छन्। 

दैनिक ज्याला मजदुरी गर्नु पर्ने परिवार चिसोका कारण बाहिर निस्कनसमेत नपाएका कारण दुई छाकको जोहोसमेत गर्न समस्या परेको उनकी सासु जितनीदेवी माझीले बताइन्। “भुइको चिसो पनि आउँछ,” उनले भनिन्, “माथिबाट शीत चुहिरहन्छ। ओढ्ने कुरा पनि राम्रो छैन। बाँसको टाटीको प्वालबाट छिरेको चिसो स्याँठले मुटु छेडेर जान्छ।” 

जोनिताजस्तै सोही बस्तीकी २१ वर्षीया पुनीता माझीले पनि गत कात्तिकमा तेस्रो सन्तानको रुपमा छोरीलाई जन्म दिइन्। चिसो कम हुँदा जसोतसो दिन रात कटाएकी उनलाई शीतलहर शुरू भएपछि भने समस्या भएको छ। चिसोले रातभरि शिशु रोएर नसुत्ने उनले बताइन्। चिसोका कारण आफू पनि निकै पटक बिरामी परिसकेकी छन्।

पुनिताका श्रीमान् पन्निलाल माझी र ससुरा हरिन्द्र माझी पनि मजदुरीका लागि पन्जाब पुगेका छन्। श्रीमान्‌ले कमाएर ल्याउलान् र मिठो मसिनो खाने तथा बालबच्चा र आफूसमेतले न्यानो कपडा लगाउने आसमा रहेको पुनिताले बताइन्। कमाइ जम्मा भएपछि पठाउँछु भनेर श्रीमान्‌ले भनेका छन्। सुत्ने ओछ्यान नजिकै बालेको घुर हेरेर रात कटाउने गरेको उनको दुखेसो छ। 

बस्तीकै अर्को कुनामा रहेको सानो बासको टाटी र खरको मुस्किलले भित्र छिर्न मिल्ने छाप्रोमा २० वर्षकी विना माझी महिना दिनको छोरा च्यापेर बसिरहेकी छन्। “भुइमा राख्यो कि चिसोले बच्चा रोइहाल्छ,” उनले भनिन्, “छातीमा च्यापी राख्यो भने न्यानो हुन्छ क्यार रुदैन।” मंसिर अन्तिममा जन्मिएको छोराले पेटभरि दूधसमेत खान नपाएको उनको भनाइ छ। 

चिसो बढेकाले परिवारको अन्य सदस्य मजदुरीमा जान नसक्दा आफूसमेतले कैयौँ रात भोकै बस्नुपरेको भन्दै शिशुलाई खुवाउन दूध नआएको उनले सुनाइन्। बिनाका श्रीमान् पनि पन्जाबमा उखु काट्ने मजदुरको काम गरिरहेका छन्। तर, आफू र शिशुलाई चिसोले धेरै सताइरहेको उनको गुनासो छ। 

यस बस्तीमा चिसो शुरू भएपछि बच्चा जन्माएका अन्य आमा र शिशुको अवस्था उस्तै छ। न्यानो कपडा त परको कुरा दैनिक छाकको जोहोसमेत गर्न सबैको मुस्किल छ। अधिकांश परिवारका पुरुष कृषि मजदुरी गर्न भारतको पन्जाब गएका छन्। उनीहरू तीनदेखि चार महिनाको अन्तरमा केही कमाएर घर फर्किने गरेका बसवरिया गाउँपालिका–३, की वडासदस्य सितादेवी माझीले बताइन्। त्यति बेलासम्म परिवारले भोकै प्यासै बस्नुपर्ने वस्तीको बाध्यता रहेको उनको भनाइ छ। विपन्न परिवारका उनीहरूलाई सरसापटसमेत कसैले नपत्याउने भएकाले बनिबुतो यस बस्तीको एकमात्र जीवन धान्ने आधार रहेको वडासदस्य सितादेवीको भनाइ छ। वर्षामा पानीमा डुब्नु र हिउँदमा चिसोले कठ्यांग्रिनु यस बस्तीको नियमित नियति रहेको उनले सुनाइन्। 

बस्तीका अन्य परिवारले पनि दिन रात घुर तापेर चिसो छल्ने प्रयास गरिरहेको बताएका छन्। व्यवस्थित बस्ने बाससमेत नभएका आफूहरूको लागि जाडो काल बनेर आउने गरेको स्थानीय मनवादेवी माझीले दुखेसो पोखिन्। गत वर्ष जाडोमा केही सामाजिक संघ संस्थाले दिएका न्यानो कपडाको भरमा जाडो छलिरहेको उनको भनाइ थियो। “पहिला पाएको केही ओढ्नेले यस वर्ष पनि चिसो छेक्दै छु,” उनले भनिन्, “यस पटक पाएको छैन, चिसो धेरै भयो भने निन्द्रा लाग्दैन। रात भरी आगो तापेर जागै बस्छु।”

स्थानीय पालिकाले विपन्नलाई राहत दिँदा सम्पन्नले पनि माग्ने भन्दै नदिने गरेका लक्षुमनिया देवीको भनाइ छ। गाउँ पालिकामा माग्न जाँदा भएकाले पनि माग्छन्। तिमीलाई कसरी दिनु भनेर त्यसै फर्काउने गरेका उनको गुनासो छ। आफू सबै ठाउँबाट चपेटामा परेको भन्दै विपन्न मुसहर परिवारले कष्टपूर्ण तरिकाले चिसोको कहरबाट बाच्ने उपाय गरिरहेको उनले बताइन्। 

यता गाउँपालिकाले विगतमा राहतको व्यवस्था गरेको भएपछि यस पटक केही ढिला भएको पालिका अध्यक्ष रामसिंहासन रायले जानकारी दिए। मुसहर परिवारको अवस्था दयनीय रहेको कुरा जानकारी नआएको अध्यक्ष रायको भनाइ छ। विपन्नका लागि ल्याएको योजनामा विपक्षी र सम्पन्नले काम नै गर्न नदिने गरेको उनको गुनासो थियो। 

“यस गाउँका पाँच परिवारको घर गत चैतमा आगोले जलेर नष्ट भयो,” उनले भने, “हामीले सिफारिस गरेर पठायौँ। पछि राजनीति गरेर अनेक गरेपछि उहाँहरूसमेत घर बनाउने पैसा पाउनुभएको छैन। पालिकाले १०/१० हजार नगद र केही खाद्यान्न दिएका थियो।” मधेशमा काम गर्न नदिने र गरेन भनेर बदनाम गर्ने प्रवृत्ति व्यापक बनेको उनको भनाइ छ। 

आगलागीबाट घरबार गुमाएका परिवार अहिले पनि चिसोमा आफन्तको सहारामा बसिरहेका छन्। आगोले उक्त बस्तीमा रहेको विन्देश्वर माझी, रामविश्वास माझी, दिनेश माझी, जोखु मुखिया र गुलरी देवीको घर जलेर पूर्ण रूपमा नष्ट भएको थियो। रासनारायण माझी, मिश्री माझी, हरिनु माझी, नरेश राय, राजकिशोर मुखिया र गोपी मुखियाको घरमा आंशिक क्षति पुगेको वडासदस्य सितादेवी माझीले बताइन्।