जलवायु परिवर्तन र शासनप्रणालीबारे कोशी तथा मधेशमा छलफल

काठमाडौँ– जलवायु परिवर्तनका विभिन्न पक्षबारे सरोकारवाला निकायसँग प्रदेश तहमा छलफल आयोजना गरिएको छ। 

नेपालमा क्रियाशील ‘ग्लोबल सेन्टर फर क्लाइमेट एन्ड सेक्युरिटी गर्भनेन्स’ले जलवायु परिवर्तन र यससँग सम्बन्धित शासनप्रणालीका बारेमा कोशी र मधेश प्रदे‍शमा छलफल गरेको हो।

जलवायु परिवर्तनका क्षेत्रमा शासनप्रणालीलाई सबल बनाउने तथा यसबारे थप पहलका लागि पैरवी गर्न प्रदेशसभा सदस्य, नागरिक समाज, प्राज्ञिक क्षेत्र र सुरक्षा निकायका प्रतिनिधिको सहभागितामा छलफल गरिएको संस्थाका कार्यकारी निर्देशक अभयराज जोशीले जानकारी दिए।

उनकाअनुसार मधेश प्रदेशको धनुषा र कोशी प्रदेशको इटहरीमा छलफल कार्यक्रम गरिएको हो। 

अन्तरक्रिया कार्यक्रममा जलवायु परिवर्तनको क्षेत्रमा शासनप्रणालीको महत्त्व तथा मुख्य सरोकारवाला पक्षबीचको सहकार्य र समन्वयबारे केन्द्रित रहेर बहस गरिएको थियो। संस्थाले यसअघि कर्णाली र सुदूरपश्चिम प्रदेशमा पनि बहस र अन्तरक्रिया कार्यक्रम गरिसकेको छ।