ब्रिक्स राष्ट्रमाथि शतप्रतिशत कर लगाउने ट्रम्पको चेतावनी

अमेरिकी राष्ट्रपति डोनाल्ड ट्रम्पले बिहीबार ब्रिक्स राष्ट्रमाथि शतप्रतिशत कर लगाउने आफ्नो धम्की दोहोर्‍याएका छन्। 

ब्रिक्स देशहरूले डलरबाट टाढा जाने प्रयास गरिरहेको र अमेरिका हेरेर बस्ने अवस्था समाप्त भएको उनको चेतावनी छ। “हामी यी देखिने रूपमा शत्रुवत् देशबाट प्रतिबद्धता माग्नेछौँ कि उनीहरूले न त नयाँ ब्रिक्स मुद्रा सिर्जना गर्नेछन्, न त शक्तिशाली अमेरिकी डलरको प्रतिस्थापन गर्न कुनै अन्य मुद्रालाई समर्थन गर्नेछन्,” ट्रम्पले आफ्नो ट्रुथ सोसल प्लेटफर्ममा लेखेका छन्, “अन्यथा उनीहरूले शतप्रतिशत भन्सार महसुलको सामना गर्नुपर्नेछ।”

ट्रम्पले यसअघि पनि ब्राजिल, रुस, भारत, चीन र दक्षिण अफ्रिकासहितका ब्रिक्स राष्ट्रहरूलाई अमेरिकी डलरको प्रतिस्पर्धी मुद्रा सिर्जना गरेमा कर लगाउने धम्की दिएका थिए। 

ब्रिक्स भन्सार महसुलबारे ट्रम्पको टिप्पणी पद आसीन भएलगत्तै तोकिएको १ फेब्रुअरी अघि आएको छ । छिमेकी क्यानडा र मेक्सिकोले अमेरिकी सीमा पार गर्ने अवैध आप्रवासी र घातक फेन्टानलको प्रवाहमाथि कडा कारबाही नगरे तिनीहरूमाथि २५ प्रतिशत भन्सार महसुल लगाउने ट्रम्पले बताएका छन्।