चैत २३ मा रकयात्रा गर्दै १९७४ एडी

काठमाडौँ– नेपालको लोकप्रिय ब्यान्ड ‘१९७४ एडी’ले आफ्नो स्थापनाको ३०औँ वर्ष पार गरेको उपलक्ष्यमा रकयात्रा-२ सांगीतिक कार्यक्रम गर्ने भएको छ। 

आगामी चैत २३ गते काठमाडौँमा वार्षिकोत्सव रकयात्रा गर्न लागिएको ब्यान्डले जनाएको छ। यस कार्यक्रमलाई सबै उमेर र रुचिका दर्शकलाई आकर्षित गर्ने अवसरका रूपमा लिइएको आयोजक टिमले जनाएको छ। प्रत्यक्ष संगीत, स्वादिष्ट खाना स्टल र सेलिब्रिटीको उपस्थितिले कार्यक्रम विशेष हुने ब्यान्ड म्यानेजर अनुज कार्कीले बताए। 

“यो इभेन्टमा सहभागी हुने सबैका लागि अविस्मरणीय अनुभव सिर्जना गर्ने लक्ष्य राख्छौँ,” उनले भने, “हामीले मनोरञ्जन, संस्कृति र समुदायलाई यसरी संयोजन गरेका छौँ। जसले कार्यक्रममा उपस्थित सबैको भावना उत्सवमय बनाउँछ।”

सन् १९९४ मा स्कुल पढाइरहेका शिक्षक मिलेर यस ब्यान्डको स्थापना गरेका थिए।