दिल्लीको मुख्यमन्त्रीमा रेखा गुप्ता, केजरीवालले दिए बधाई

काठमाडाैँ– भाजपा नेतृ रेखा गुप्ता नयाँदिल्लीको मुख्यमन्त्री बन्ने भएकी छन्। 

दिल्लीमा बुधबार साँझ बसेको विधायक (संसदीय) दलको बैठकपछि भारतीय जनता पार्टी (भाजपा)ले राज्यको नयाँ मुख्यमन्त्रीमा उनलाई चयन गरेको भारतीय सञ्चारमाध्यमले जनाएका छन्। भाजपा विधायक दलको बैठकमा रेखा गुप्तालाई नेता चुनिएको थियो।

योसँगै रेखा गुप्ता दिल्लीको चौथो महिला मुख्यमन्त्री हुनेछिन्। उनले भोलि (फेब्रुअरी २०) नै दिल्लीको रामलीला मैदानमा शपथग्रहण गर्ने बताइएको छ।

भाजपाको संसदीय बोर्डले दलको नेताको चुनावको लागि सांसद तथा पूर्व केन्द्रीय मन्त्री रविशंकर प्रसाद र भाजपा राष्ट्रिय सचिव ओपी धनकरलाई केन्द्रीय पर्यवेक्षकको रूपमा नियुक्त गरेको थियो।

मुख्यमन्त्रीको घोषणापछि भाजपा सांसद मनोज तिवारीले समाचार एजेन्सी एएनआईलाई भने, "महिला सम्मान भाजपाको लागि सबैभन्दा ठूलो प्राथमिकता हो। रेखा गुप्तालाई विधायक दलको नेता बनेकोमा र दिल्लीको मुख्यमन्त्री बनेकामा धेरै धेरै बधाई।"

दिल्ली विधानसभा चुनावमा भाजपा २७ वर्षको लामो अन्तरालपछि कुल ७० सिटमध्ये ४८ सिट जितेर सत्तामा फर्किएको छ। गत फेब्रुअरी ८ मा चुनावको नतिजा घोषणा भएदेखि नै मुख्यमन्त्रीको लागि धेरै नामहरूको अनुमान गरिएको थियो।

दलको नेतामा निर्वाचित भएपछि रेखा गुप्ताले भनिन्, "यहाँ मलाई आशीर्वाद दिनुहुने सबैलाई धेरै धेरै धन्यवाद। मेरा सबै साथी विधायकहरूले आफ्नो समर्थन दिएर मलाई यो जिम्मेवारी दिनुभएको छ। म तपाईंहरू सबैलाई हृदयदेखि नै धन्यवाद दिन्छु।"

आम आदमी पार्टीका संयोजक अरविन्द केजरीवाल र दिल्लीकी पूर्व मुख्यमन्त्री आतिशीले पनि रेखा गुप्तालाई दिल्लीको नयाँ मुख्यमन्त्री निर्वाचित भएकोमा बधाई दिएका छन्। आम आदमी पार्टीका यी दुवै नेताले दिल्लीको विकासका लागि नयाँ मुख्यमन्त्रीलाई पूर्ण समर्थन गर्ने बताएका छन्।

अरविन्द केजरीवालले सामाजिक सञ्जाल प्लेटफर्म एक्समा लेखेका छन्, "रेखा गुप्ता जीलाई दिल्लीको मुख्यमन्त्री बनेकोमा धेरै धेरै बधाई छ। मलाई आशा छ कि उहाँले दिल्लीका जनतालाई गरेका सबै वाचाहरू पूरा गर्नुहुनेछ। हामी दिल्लीका जनताको विकास र कल्याणको लागि उहाँलाई हरेक काममा समर्थन गर्नेछौं।"

आतिशीले इन्स्टाग्राममा लेखेकी छिन् , "रेखा गुप्ता जीलाई दिल्लीको मुख्यमन्त्री बनेकोमा बधाई छ। दिल्लीको नेतृत्व महिलाले गर्नु खुशीको कुरा हो। मलाई आशा छ कि दिल्लीका जनतालाई गरिएका वाचाहरू पूरा हुनेछन्। दिल्लीको विकासको लागि तपाईंलाई आम आदमी पार्टीको पूर्ण समर्थन प्राप्त हुनेछ।"

को हुन् रेखा गुप्ता?
रेखा गुप्ता दिल्लीको शालीमार बाग विधानसभा क्षेत्रबाट विधायक हुन्। उनी हाल दिल्ली भाजपाको महासचिव र भाजपा महिला मोर्चाको राष्ट्रिय उपाध्यक्ष पनि हुन्। ५० वर्षीया रेखाको जन्म १९७४ मा हरियाणाको जिन्द जिल्लाको नन्दगढ गाउँमा भएको थियो। उनका बुबा स्टेट बैंक अफ इन्डियामा अधिकारी थिए। 

रेखाको परिवार १९७६ मा दिल्ली सरेको थियो। त्यतिबेला उनी दुई वर्षको मात्र थिइन्। त्यसपछि रेखाको प्राथमिकदेखि उच्च शिक्षा दिल्लीमै भयो। उनको राजनीतिक यात्राको शुरूआत विद्यार्थीकालमै राष्ट्रिय स्वयंसेवक संघ (आरएसएस)को विद्यार्थी शाखा अखिल भारतीय विद्यार्थी परिषद् (एबीभीपी) बाट भएको थियो।