ठेकेदारको लापरबाहीले रामेछापको कोलन्जोर घाट पुल अलपत्र

मन्थली– कोलन्जोर घाटमा निर्माणाधीन पक्की पुलको काम सम्पन्न भएको छैन। ठेकेदारको लापरबाहीका कारण रामेछापको ‘लाइफलाइन’का रूपमा रहेको यो पुल निर्माण हुन नसकेको हो।

रामेछापलाई मध्यपहाडी राजमार्गमा जोड्नका लागि रामेछाप नगरपालिकाको रामपुरस्थित कोलन्जोर घाटको सुनकोशी नदीमा निर्माणाधीन यो पुल चार वर्षअघि नै सम्पन्न हुनुपर्ने थियो। त्यसयता लगातार म्याद थपिए पनि निर्माण सम्पन्न हुन सकेको छैन। २०७७ सालमै सम्पन्न हुनुपर्ने उक्त पुलको म्याद यही २०८१ साल चैत २० गतेसम्म थपिएको छ। म्याद सकिन एक महिना बाँकी रहँदा बाँकी काम शुरू नै हुन सकेको छैन। 

रामेछाप नगरपालिका प्रमुख लवश्री न्यौपानेले पुल निर्माणका लागि ताकेता गरिरहेको भए पनि व्यवसायीले चासो नगरेको  बताए। सडक विभागको पुल सेक्टर आयोजनाले २०७४ सालमा ठेक्का लगाएको थियो। शंकरखोला दोभान पुल आयोजना नामको यस पुल ‘डिजाइन एन्ड बिल्ड’ प्रक्रियाबाट निर्माण थालिएको थियो। अनक महावीर जेभीले पुल निर्माणको जिम्मेवारी पाएको थियो। कुल १९० मिटर लामो पक्की पुल निर्माणका लागि २३ करोड ६८ लाख रुपैयाँमा सम्झौता भएको थियो।

यस पुलले मध्य पहाडी राजमार्गअन्तर्गत सिन्धुलीको फिक्कल गाउँपालिका र रामेछापको रामेछाप नगरपालिका जोड्नेछ। पुलको स्ल्याब ढलानको काम भइसकेको छ तर पुलमा आउने ‘एप्रोच’ सडक, ‘रिटेनिङ वाल’ र ‘रेलिङ’को काम भने बाँकी छ। पुल नबन्दा आफूहरूलाई समस्या भइरहेको स्थानीय कोमल श्रेष्ठले बताए। 

पुल आयोजना सेक्टरका इन्जिनियर नेत्रविलाश पौडेलले पुलको काम अगाडि बढाउन कार्यालयबाट पटक पटक मौखिक तथा लिखित अनुरोध गरे पनि निर्माण व्यवसायीले अटेर गरिरहेको बताए। “निर्माण व्यवसायीले लगातार काम गर्ने हो भने बढीमा दुई महिनाभित्र पुलको सम्पूर्ण काम सकिन्छ तर उहाँहरू हामी चाँडै सम्पन्न गर्छौं भन्नुहुन्छ तर साइडमा कामदार पठाउनुहुन्न,” उनले भने।