तनहुँ जलविद्युत्: प्रसारण लाइन निर्माणमा विलम्ब

दमौली– तनहुँको ऋषिङ गाउँपालिका–१ झापुटारमा निर्माणाधीन १४० मेगावाटको तनहुँ जलविद्युत् आयोजनाको भूमिगत विद्युत्‌गृहभित्रको काम पूरा भए पनि प्रसारण लाइन निर्माणमा विलम्ब भएको छ।

आयोजनाको प्याकेज २ अन्तर्गत विद्युत्‌गृहमा इलेक्ट्रोमेकानिकल काम जारी रहेको आयोजना प्रमुख श्यामजी भण्डारीले बताए। हेडरेस टनेल खनेरपेनस्टक पाइप जडान, वेल्डिङ तथा कंक्रिटिङ भइरहेको छ। प्याकेज २ मा हालसम्म ६६ प्रतिशत भौतिक प्रगति भएको छ।

तीन वटा प्याकेजमा काम भइरहेको आयोजनाको हालसम्मको समग्र भौतिक प्रगति ६५ प्रतिशत पुगेको छ। प्याकेज ३ अन्तर्गत प्रसारण लाइन निर्माणमा भने खासै प्रगति भएको छैन। वन क्षेत्रका कारण विलम्ब भएको आयोजना प्रमुख भण्डारीको भनाइ छ।