पाल्पाका चार सामुदायिक वनमा तीन दिनदेखि डढेलो

तानसेन– पाल्पाको रिब्दीकोट गाउँपालिका १ र २ को सिमानामा पर्ने  संसारकोट डाँडामा मंगलबार दिउँसोदेखि लागेको आगो अझै निभाउन सकिएको छैन।

अधिक पातपतिंगर र लगातारको हुरीका कारण आगो निभाउन नसकिएको जिल्ला प्रहरी कार्यालयले जनाएको छ। डढेलोबाट करिब १७० हेक्टरमा फैलिएका चार वटा सामुदायिक वनमा क्षति भएको छ। 

डिभिजन वन कार्यालयका अनुसार देउरालीको लेक सामुदायिक वन, भारेखोला सामुदायिक वन, मधुवन सामुदायिक वन र वृन्दावन सामुदायिक वनमा क्षति भएको हो। 

आगो निभाउन नेपाली सेना, सशस्त्र प्रहरी बल र स्थानीयले प्रयास गरिरहेका छन्।