टी२० शृंखलामा युगान्डामाथि नेपाल १ विकेटले विजयी

काठमाडौँ– चार देशीय महिला टी२० क्रिकेट शृंखलामा नेपालले आफ्नो दोस्रो खेलमा घरेलु टोली युगान्डालाई पराजित गरेको छ। नेपालले युगान्डामाथि १ विकेटको रोमाञ्चक जित हात पारेको हो। 

आइतबारको खेलमा युगान्डाले दिएको ७७ रनको लक्ष्य नेपालले १९.५ ओभरमा ९ विकेटको क्षतिमा पूरा गर्‍यो। नेपालको जितमा साना प्रविनले सर्वाधिक १७ रन बनाइन्। त्यस्तै, पूजा महतो १६, रुबिना क्षेत्रीले १० रन बनाइन्।

बलिङतर्फ युगान्डाकी जानेत बाबजीले ३ विकेट लिइन् भने सारा वालाजाको नाममा २ विकेट रह्यो।

युगान्डाको एन्टेब्बे क्रिकेट ओभलमा टस हारेर ब्याटिङको निम्तो पाएको युगान्डाले निर्धारित २० ओभरमा ७ विकेट गुमाएर ७६ रनको योगफल बनायो।

युगान्डाका लागि इमाकुलेट नाकिसुईले सर्वाधिक २२ रन जोडिन्। स्टेफेनिया नाम्पिलिनाले १४ रन जोडिन् भने मलिषा अरिकोटाले ११ रन जोडिन्।

नेपालका लागि पूजा महतोले ३ विकेट लिइन् भने कप्तान इन्दु बर्माले २ विकेट लिइन्। 

जारी शृंखलामा दुई खेल खेलेको नेपालको यो पहिलो जित हो। यसअघि शनिबार नेपाल नामिबियासँग ६ विकेटले पराजित भएको थियो।

नेपालले अब तेस्रो खेल सोमबार हङकङसँग खेल्नेछ।