इटहरीमा हराए सार्वजनिक धारा, बटुवालाई प्यास मेटाउन मुस्किल

सुनसरी– विगत वर्षजस्तै यस वर्षमा पनि यो समय तराईमा गर्मी निकै बढेको छ। गर्मीसँगै यस तराईका जिल्लामा काम गर्दै आएका सडक मजदुर, पैदलयात्रु एवं बटुवालाई प्यास मेटाउन मुस्किल हुने गरेको छ। यस क्षेत्रमा सार्वजनिक धारा एवं कुवा पाउनै मुस्किल छ।

पछिल्लो समय शहरमा सार्वजनिक धाराको संस्कृति हराउँदै गएको छ। व्यापारिक शहरको छवि बनाएको इटहरीमा प्यास लाग्दा पानी पाउन कठिन छ। दैनिक सयौँ यात्रु यही बाटो हुँदै यात्रा गर्छन्। व्यापारिक ‘ट्रन्जिट प्वाइन्ट’ इटहरीमा रोकिएका यात्रुलाई प्यास लागे सार्वजनिक धारा भेटिँदैन। प्यास मेटाउन होटलभित्र छिर्नुपर्छ कि त पसलबाट न्यूनतम २० रुपैयाँ खर्चेर बोतलको पानी किन्नुपर्छ। क्याफेमा २५ देखि ५० सम्म तिर्नुपर्छ। इटहरीको मुख्य बजार क्षेत्रमा भेटिएका वडा नं १० का स्थानीय बासिन्दा प्रमोद चौधरी सार्वजनिक धारा नहुँदा पानी किनेर प्यास मेटाउनुपर्ने बाध्यता भएको बताउँछन्।

“प्यास लागे अर्काको घर छिर्नु भएन, पालिकाले कतै सार्वजनिक धारा राखिदिएको छैन, पानी किनेर खानुको विकल्प छैन,” उनले भने। वडा नं ३ बाट घर बाटोको सिफारिस लिन उपमहानगरपालिकाको कार्यालय, आएकी कमलादेवी तामाङले पनि प्यास लाग्दा पानी किनेर नै खाएको बताए। 

दिनानुदिन गर्मी बढ्दै छ। शहरमा सार्वजनिक स्थानमा पिउने पानीको व्यवस्था नगरिँदा रिक्सा चालक, सफारी चालक, यात्रा गर्ने बटुवा वा अन्य सर्वसाधारणलाई पानी पिउन समस्या हुने गरेको छ। विसं २०६६ अघि भने इटहरीका विभिन्न सार्वजनिक स्थानमा ८४ वटा सार्वजनिक धारा थिए। खाने पानीबाट जोडिएका यी सार्वजनिक धाराबाट सिधै पानी पिउन सकिन्थ्यो। यसले गर्दा बटुवा वा यात्रीलाई सहज थियो। तर इटहरी खाने पानी उपभोक्ता संस्थाले सार्वजनिक धारा हटाउने नीति लियो।

धारा धेरै बिग्रेको र खर्च धेरै आएका कारण सबै धारा कटौती गरिएको इटहरी खाने पानी उपभोक्ता संस्थाका व्यवस्थापक हरिबहादुर कटुवालले बताए। “संस्थाले सार्वजनिक स्थानमा धारा नराख्ने नीति नै लिएको छ”, उनले भने, “सार्वजनिक स्थानमा धारा हुँदा चरम दुरूपयोग भएका कारण कार्यालयले नराख्ने निर्णय गरेको हो।” 

इटहरी खाने पानी उपभोक्ता संस्थाअन्तर्गत हाल तीन वटा पानीका ट्यांकी छन्। दैनिक दुई करोड १६ लाख पानी प्रशोधन गर्ने क्षमता रहेको यस कार्यालयले इटहरी उपमहानगरका–२० वडामध्ये १२ वटा वडा लाई मात्र पानीको आपूर्ति गर्दै आएको छ।

इटहरी उपमहानगरले पनि सार्वजनिक स्थानमा पानी पिउने व्यवस्था गरेको छैन। दैनिक हजारौँ व्यक्ति यात्राका दौरान, आर्थिक तथा व्यवसायी कारोबार वा अन्य कामका लागि इटहरी आउँछन्। यस्तो व्यस्त शहरमा सर्वसाधारणलाई पानी पिउन भने समस्या भोग्दै आउनुपरेको छ।