राहदानीको ‘अपोइन्टमेन्ट डेट’ बुकिङ अब साढे ३ बजेपछि मात्रै

काठमाडौँ– राहदानी बनाउन आवेदन दिँदा सेवाग्राहीले राहदानी विभागबाट लिनुपर्ने ‘अपोइन्टमेन्ट डेट’को समय परिवर्तन गरिएको छ।

राहदानी विभागले सोमबार सूचना जारी गर्दै यस्तो समय परिवर्तन भएको जानकारी दिएको हो। विभागले साउन १७ देखि बिहान ११ बजे राहदानी आवेदनका लागि अपोइन्टमेन्ट डेटको बुकिङ खोल्ने व्यवस्था गरेको थियो।

अब अपराह्न साढे ३ बजेदेखि मात्र अपोइन्टमेन्ट डेट खोल्ने विभागले जनाएको छ। अपोइन्टमेन्ट डेट लिनका लागि एकै समयमा धेरै सेवाग्राहीले माग गरेको र यसले सर्भरमा चाप देखिएका कारण समय परिवर्तन गरिएको विभागको भनाइ छ।

“प्रायःजसो जिल्ला र इलाका प्रशासन कार्यालयले पनि सोही समयमा बुकिङ खोल्ने गरेको जानकारी विभागमा प्राप्त हुन आएको छ। जसकारण विभागको सर्भरमा अत्यधिक चाप पर्न गई वेबसाइटको पेज खुल्न समय लाग्ने र हाई ट्राफिक भोलुम भन्ने म्यासेज देखाउने गरेको छ”, सूचनामा भनिएको छ।

राहदानी लिनका लागि फाराम भरी अनलाइनबाट मिति र समय बुक गर्नुपर्छ। बुकिङ गरेको मिति र समयभन्दा अगाडि आएर लाइन बसेकै आधारमा विभागले सेवा दिँदैन। त्यसकारण आफ्नो बुकिङको दिन तोकिएको समयमा मात्र आउनुपर्ने व्यवस्था छ।

यसरी अपोइन्टमेन्ट बुक गर्नका लागि बिहान कार्यालय समयपछि विभागका सर्भरमा बढी चाप पर्ने गरेको थियो। अपराह्न साढे ३ बजेपछि अपोइन्टमेन्ट डेट लिने व्यवस्था कार्यान्वयन गर्दा सर्भरमा समस्या कम हुने विभागले जनाएको छ।