होन्डुरसमा जहाज दुर्घटना हुँदा कम्तीमा ७ जनाको मृत्यु

होन्डुरसको क्यारेबियन टापु रोआटानबाट उडेको जहाज समुद्रमा दुर्घटना हुँदा कम्तीमा सात जनाको मृत्यु भएको छ। 

लान्सा एयरलाइन्सको जहाजले रोआटानबाट सोमबार साँझ उडान भरेको थियो र ला सेइबा बन्दरगाहतर्फ जाँदै थियो। रोआटान होन्डुरसको मुख्य पर्यटकीय गन्तव्यमध्ये एक हो। “विमान झन्डै हामीमाथि खस्यो । म माछा मार्दै थिएँ,” एचसीएच टेलिभिजनसँग एक माझीले भने। 

दमकल विभागका मेजर विल्मर गुरेरोले दुर्घटनास्थलबाट १० जनालाई निकालिएको र तीमध्ये ६ जनालाई अस्पतालमा मृत घोषित गरिएको बताए। समुद्रमा जहाज नजिकै एक चालक दलका सदस्यको शव तैरिरहेको फेला परेको थियो। उक्त विमान किनारबाट करिब एक किलोमिटर टाढा दुर्घटनामा परेको थियो ।

अधिकारीहरूका अनुसार जहाजमा १८ जना सवार थिए। होन्डुरसका राष्ट्रपति सिओमारा क्यास्ट्रोले दुर्घटनाका पीडितहरूलाई सहयोग गर्न सशस्त्र बल, दमकल र आपत्कालीन समिति खटिएको बताए। 

ब्रिटिस निर्मित जेटस्ट्रीम ४१ मा ‘स्पष्ट यान्त्रिक खराबी’का कारण दुर्घटना भएको प्रहरीले जनाएको छ।