साफ यू१९ च्याम्पियनसिप: नेपालको पहिलो खेल श्रीलंकासँग

काठमाडौँ– दक्षिण एशियाली फुटबल महासंघ (साफ) यू१९ च्याम्पियनसिप फुटबल प्रतियोगिताको खेलतालिका सार्वजनिक भएको छ।

भारतको अरुणाञ्चल प्रदेशस्थित गोल्डेन जुब्ली रंगशालामा हुने प्रतियोगिता आगामी मे ९ देखि १८ तारिखसम्म हुनेछ। 

मंगलबार सार्वजनिक गरिएको खेल तालिकाअनुसार नेपालले आफ्नो पहिलो खेल श्रीलंकासँग खेल्नेछ। उक्त खेल आगामी मे ११ तारिखमा हुनेछ। सोही दिन भुटान र बांग्लादेशबीच पनि प्रतिस्पर्धा हुनेछ।

प्रतियोगितामा नेपाल समूह ‘बी’ मा परेको छ। समूह ‘बी’ मा नेपालसँगै भारत र श्रीलंका छन्। नेपालले आफ्नो दोस्रो खेलमा मे १३ तारिखमा घरेलु टोली भारतको सामना गर्नेछ। १३ तारिखमै हुने अर्को खेल मालदिभ्स र भुटानबीच हुनेछ। 

उक्त प्रतियोगिताको समूह ‘ए’ मा भने साविक विजेता बांग्लादेश, मालदिभ्स र भूटान छन्। प्रतियोगिताको उद्घाटन खेलमा बांग्लादेश र मालदिभ्सबीच प्रतिस्पर्धा हुनेछ। उद्घाटनकै दिन हुने अर्को खेलमा श्रीलंका र भारतबीच प्रतिस्पर्धा हुने जनाइएको छ।