यौन व्यवसायसम्बन्धी अभिव्यक्तिमा कांग्रेस प्रमुख सचेतकले मागे माफी

काठमाडौँ– नेपाली कांग्रेसका प्रमुख सचेतक श्यामकुमार घिमिरेले संसद्‌मा आफूले व्यक्त गरेको अभिव्यक्तिप्रति क्षमा याचना गरेका छन्। 

प्रतिनिधिसभाको बुधबारको बैठकको आकस्मिक समयमा उनले यही चैत ३ गतेको बैठकमा व्यक्त गरेको विचारप्रति क्षमा याचना गरेका हुन्। उक्त दिन प्रमुख सचेतक घिमिरेले यौन व्यवसायलाई कानूनी मान्यता दिनुपर्ने धारणा व्यक्त गरेका थिए। त्यसको संसद्‌भित्र र बाहिर आलोचना भएको थियो।

उक्त अभिव्यक्ति आफूले प्रतिनिधित्व गरेको नेपाली कांग्रेस  र संसदीय दलको नभएको तथा त्यो आफ्नो व्यक्तिगत धारणा भएको स्पष्ट पारे। “मेरा विचारले सम्मानित संसद्का सदस्य र अन्य जनसमुदायमा केही नकारात्मक प्रभाव परेको भए उहाँहरूको सम्मान गर्दै क्षमा याचना गर्न चाहन्छु,” सांसद घिमिरेले भने।