गाउँ फर्केर तरकारी खेती : वार्षिक सात लाख आम्दानी

तनहुँ– जिल्लाको भिमाद नगरपालिका–९ पाइमीका हिराबहादुर थापा २९ वर्षदेखि सागसब्जी खेतीमा आवद्ध छन्। विसं २०५२ मा थानकोटबाट सागसब्जी खेती शुरू गरेका थापाले पछिल्लो समय आफ्नै गाउँ फर्किएर खेती विस्तार गरेका हुन्।

विगतमा अन्यत्र खेती गर्दा जग्गा भाडा लिनुपर्ने बाध्यता रहेको बताउँदै थापाले अहिले आफ्नै सात रोपनी जग्गामा खेती गरिरहेको जानकारी दिए। गाउँको जग्गा बाँझो भएकाले यहाँ आएर सागसब्जी खेतीलाई निरन्तरता दिएको उनले बताए।

“अन्यत्र अर्काको जग्गा भाडामा लिएर खेती गर्दा गुजारा मात्रै चल्ने आम्दानी हुन्थ्यो। गाउँ फर्किएर बाँझो रहेका आफ्नै जमिनमा खेती गरिरहेको छु, अहिले आम्दानीसँगै बचत पनि भइरहेकाले सन्तुष्ट छु,” उनले सुनाए।

शुरूमा थानकोटमा जग्गा भाडामा लिएर सागसब्जी खेती शुरू गरेको भन्दै उनले त्यहाँ गोलभेँडा उत्पादन नभएपछि गाउँ फर्किएको अनुभव सुनाए।

उनले भने, “खैरेनीटारमा गोलभेँडा उत्पादन भएन। जग्गाको भाडा तिर्ने खर्च पनि जुटाउन गाह्रो भएपछि माटोको परीक्षण र अनुसन्धान गरेँ। त्यहाँको माटो उपयुक्त नरहेको पाएपछि २०७९ सालमा गाउँ फर्किएँ।”

अहिले वार्षिक सात लाख रुपैयाँभन्दा बढी आम्दानी हुने गरेको थापाले जानकारी दिए। उत्पादित सागसब्जी बिक्रीका लागि बजारको समस्या नरहेको भन्दै उनले सिँचाइ अभाव भएकाले ४० हजार लिटरको पोखरी बनाएर प्रयोग गरिरहेको बताए।

दुई वटा टनेलबाट शुरू गरेको सागसब्जी खेतीलाई विस्तार गर्दै अहिले ११ वटा टनेल बनाएको थापाले बताए। यहाँ बोडी, सिमी, काँक्रो, भिन्डी, फर्सी, लौका, अकबरे, गोलभेँडा, करेला उत्पादन भइरहेका छन्।

उनले सोधे, “सागसब्जी कहाँ बिक्री गर्ने भन्ने समस्या छैन। दुलेगौँडा, खैरेनीटार, भिमादलगायत स्थानीयस्तरमा खपत भइरहेको छ।”