कोशी, बागमती, मधेश र गण्डकीमा हल्का वर्षाको सम्भावना

काठमाडौँ– देशमा पश्चिमी न्यूनचापीय प्रणाली तथा स्थानीय वायुको आंशिक प्रभाव रहेको छ। कोशी, बागमती र मधेशमा आंशिकदेखि साधारणतया बदली रहनेछ। 

मौसम पूर्वानुमान महाशाखाका अनुसार कोशी र मधेशका एक–दुई स्थानमा मेघगर्जन र चट्याङसहित हल्का वर्षा भइरहेको छ। दिउँसो कोशी, मधेश, बागमती र गण्डकीमा आंशिकदेखि साधारणतया बदली रही बाँकी स्थानको मौसम सफा रहनेछ। 

कोशी र बागमतीका केही स्थान तथा मधेश र गण्डकी प्रदेशका एक–दुई स्थानमा मेघगर्जन र चट्याङसहित हल्का वर्षाको सम्भावना छ। कोशी, बागमती र गण्डकीका उच्च पहाडी तथा हिमाली भूभागमा हल्का हिमपातसमेत हुनेछ।

त्यसैगरी, राति कोशीमा आंशिक बदली रही बाँकी प्रदेशमा मौसम सफा रहनेछ। कोशीका एक–दुई स्थानमा मेघगर्जन र चट्याङसहित हल्का वर्षा तथा उच्च पहाडी तथा हिमाली भूभागमा हिमपातको सम्भावना रहेको महाशाखाले जनाएको छ।