दासताविरुद्धको अन्तर्राष्ट्रिय दिवस मनाइँदै

दासत्व र ‘ट्रान्सएटलान्टिक’ दास व्यापार पीडितहरूको अन्तर्राष्ट्रिय स्मृति दिवस मंगलबार मनाइँदै छ। सन् १८०७ मा संयुक्त अधिराज्यमा दास व्यापार उन्मूलन ऐन पारित भएको सम्झनामा सन् २००७ देखि संयुक्त राष्ट्रसंघको आह्वानमा यो दिवस मनाउन थालिएको हो।

विशेषगरी अफ्रिकी मुलुकहरूबाट श्रमका लागि संयुक्त अधिराज्य, अमेरिकालगायत विकसित राष्ट्रले मानिसलाई दासका रूपमा काममा लगाएकाले त्यसको उन्मूलनका निम्ति उक्त ऐन पारित भएको सम्झना तथा सधैँ काममा जोतिनुपरेका ती श्रमिकको सम्मान एवं सम्झनामा यो दिवस मनाउने गरिन्छ। 

उक्त ऐनले कुनै पनि व्यक्तिलाई दासका रूपमा बेच्न, स्थानान्तरण, प्रयोग वा दासका रूपमा व्यवहार गर्न, खरिद बिक्री र विनिमयलाई पूर्ण रूपमा निषेध गरेको छ। संसारभरका श्रमिकलाई ससम्मान पारिश्रमिकसहित काममा लगाउनुपर्नेमा यो दिवसले जोड दिएको छ।

दिवसका अवसरमा न्युयोर्कस्थित राष्ट्रसंघीय प्रधान कार्यालयमा एक कार्यक्रम हुँदै छ। कार्यक्रममा नोबेल पुरस्कार विजेता ओल सोइन्काले प्रवचन दिनेछन्।