साउनयता ५६ अर्ब बराबरको खानेतेल निर्यात

छिमेकी मुलुक भारतसँग मात्र नेपालले आठ महिनामा ५ खर्ब ६३ अर्ब ६७ करोड रुपैयाँको व्यापार घाटा बेहोरेको छ।

उकालो

बुधबार, १३ चैत, २०८१

साउनयता ५६ अर्ब बराबरको खानेतेल निर्यात

काठमाडौँ– नेपालले पछिल्लो आठ महिनामा करिब ५६ अर्ब रुपैयाँ बराबरको खानेतेल निर्यात गरेको छ। विदेशबाट कच्चा पदार्थ आयात गर्ने र नेपालमा प्रशोधन गरी मूल्य अभिवृद्धि गरेर खानेतेल बेच्दा निर्यात उल्लेख्य रूपमा बढेको हो।

भन्सार विभागले सार्वजनिक गरेको चालु आर्थिक वर्षको फागुन मसान्तसम्मको वैदेशिक व्यापारको तथ्यांकअनुसार गत आर्थिक वर्षको सोही अवधिको तुलनामा यसवर्ष आयात ११.२० र निर्यात ५७.२० प्रतिशतले बढेको छ। अर्थात् गतवर्षको तुलनामा यसवर्ष नेपालको निर्यातमा खानेतेलको निकै ठूलो हिस्सा देखिएको छ। 

१ खर्ब ५८ अर्ब रुपैयाँको निर्यात गर्दा नेपालले ४७ अर्ब ९४ करोड ६६ लाख रुपैयाँ बराबरको भटमास (सोयाबिन) तेल मात्रै निर्यात गरेको छ। त्यस्तै, ७ अर्ब ९८ करोड २३ लाख बराबरको सूर्यमुखी तेल, ५ अर्ब ८३ करोड ७३ लाखको अलैँची, ४ अर्ब ३२ करोड ३९ लाखको कार्पेट निर्यात भएको छ।

विभागका अनुसार चालु आवको दोस्रो चौमासिक अवधिसम्म मुलुकले कुल १३ खर्ब ३ अर्ब ७३ करोड ८६ लाख बराबरको वैदेशिक व्यापार गर्दा ९ खर्ब ८७ अर्ब ३९ करोड ३८ लाखको घाटा बेहोरेको छ। पछिल्लो आठ महिनामा ११ खर्ब ४५ अर्ब ५६ करोड ६२ लाख बराबरको वस्तु आयात भएको छ। १ खर्ब ५८ अर्ब १७ करोड २४ लाख बराबरको निर्यात भएको छ।

छिमेकी मुलुक भारतसँग मात्र नेपालले आठ महिनामा ५ खर्ब ६३ अर्ब ६७ करोडको व्यापार घाटा बेहोरेको छ। गत साउनदेखि फागुनसम्म भारतबाट ६ खर्ब ८८ अर्ब ६८ करोडको आयात हुँदा १ खर्ब २५ अर्ब बराबरको निर्यात भएको छ। चीनसँग २ खर्ब १९ अर्ब १८ करोडको आयात र २ अर्ब १२ करोडको निर्यात हुँदा २१ अर्ब ७० करोडको व्यापार घाटा बेहोरेको छ। साथै अर्जेन्टिना, युक्रेन, युनाईटेड अरब ईमिरेट्स, अस्ट्रेलियालगायत मुलुकहरूसँग नेपालको व्यापारघाटा उच्च छ। उक्त अवधिमा ३४ वटा मुलुकसँगको व्यापारमा नेपाल नाफामा छ। अफगानिस्तान, डेनमार्क, रसिया, अस्ट्रिया, माल्दिभ्सलगायतका मुलुकसँगको वैदेशिक व्यापारमा नेपाललाई नाफा छ।

सो अवधिमा पेट्रोलियम पदार्थको आयात उच्च छ। पछिल्ला आठ महिनामा नेपालले ७८ अर्ब ८६ करोड ३७ लाखको डिजेल, ४२ अर्ब ८० करोड १७ लाखको पेट्रोल र ४१ अर्ब बराबरको एलपी ग्यास आयात गरेका छ। त्यस्तै, ९ अर्ब ६९ करोड २२ लाख बराबरको विद्युतीय सवारीसाधन र २ अर्ब ११ करोड बराबरको अन्य सवारीसाधन आयात भएको छ। यो अवधिमा २१ अर्ब ९१ करोड ८३ लाख बराबरको १४ लाख ७७८ वटा स्मार्टफोन आयात भएको पनि विभागको तथ्यांक छ।

प्रतिक्रिया दिनुहोस !