गर्मीसँगै बढ्यो उखु जुसको व्यापार, व्यापारी उत्साहित

महोत्तरी– तराई मधेशमा गर्मी बढ्दै गएको छ। यससँगै उखु जुसको बिक्री बढेपछि व्यापारी उत्साहित भएका छन्।  

गौशाला–५ का मोहम्मद साबिर चैत लागेसँगै दैनिकजसो करिब एक क्विन्टल उखु पेलेर जुस बेच्न थालेको र गर्मी बढ्दै जाँदा व्यापार पनि थपिँदै गएको बताए। “अहिले राम्रो बिक्री छ, कुनैकुनै बेला त ग्राहकको भीड नै लाग्छ,” बर्दिबासचोक र आसपास ठेलामा घुमन्ते व्यापार गर्दै आएका उनले भने, “मध्याह्नपछि जुस खोज्ने बढी हुन्छन्। चैत लागेयता दैनिक करिब एक क्विन्टल उखु पेलेर बेच्ने गरेको छु।” 

धेरै जाँगर र आँट चल्ने युवा उमेर विदेशमा बिताएका ४० वर्षीय साबिरले उखुको जुस बेच्न थालेको एक वर्षमात्र भयो। यसै अवधिमा जहान परिवार, चार छोराछोरीको शिक्षादीक्षासहित विदेश जाँदा लागेको ३ लाखभन्दा बढी ऋण तिरेको उनले सुनाए। “गर्नेलाई त यही ठाउँ रहेछ नि! के गर्नु पहिले विदेश गएर के के न  गरौँला भन्ने लाग्यो, तीनपटक गरेर १२ वर्ष मलेसिया र कत्तारमा बिताइयो। ऋणको भारी बोकियो,” उनी भन्छन्, “अहिले उखुको जुसको व्यापारबाट महिनामा करिब ५० हजारसम्म कमाइ हुने गरेको छ।”

बर्दिबास चोकबजार क्षेत्रमा हाल साबिरजस्ता १५/१६ जनाले यस्तै व्यापार गर्न थालेका छन्। जसमा विदेश गएर फर्किएकाहरू नै बढी छन्। तीमध्येका एक हुन्, मिथिला नगरपालिकाका पञ्चलाल साह। बर्दिबासचोकमा जुस बेच्ने गरेका उनले भने, “दलालको पछि लागेर विदेश गइयो, ऋणले थिच्यो, उता भनेको काम पाइएन। यहाँ फर्किएपछि यही काम गरिरहेको छु। अब भने आफ्नो ठाउँ छोडेर कतै जाने सोच छैन।” 

साहले जुस व्यापारबाट ६ जनाको परिवारको लालनपालनसहित मासिक ३० हजारसम्म बचाउने गरेको बताए। आफ्नो ठाउँमा सानो लगानीमा शुरू गर्न सकिने उद्यम छाडेर विदेश धाएको विगत सम्झेर अचेल पछुतो मात्रै लाग्ने गरेको उनको भनाइ छ।

गर्मी बढेसँगै बर्दिबासमात्र नभएर जिल्लाका गौशाला, रामगोपालपुर, औरही र सदरमुकाम जलेश्वरमा पनि उखुको जुसको व्यापार फस्टाउँदो छ। यस्तो व्यापारमा लागेकाहरू आफ्नो गाउँठाउँभन्दा छिमेकका बजारमा रमाउने गरेका छन्। “छन् त हाम्रै ईश्वरपुर र लालबन्दीमा पनि जुसको राम्रो व्यापार छ तर आफूलाई चिनेको क्षेत्रमा भन्दा अलि पर काम गर्दा खुलेर गर्न पाइँदो रहेछ,” सर्लाहीको ईश्वरपुर नगरपालिकाको श्रीनगरका २१ वर्षीय विक्कीकुमार साहले भने, “आफ्नो ठाउँमा सघाउनेभन्दा टिप्पणी गर्ने बढी हुन्छन्, त्यसैले घरबाट १५/१६ किलोमिटर यता  बर्दिबास रोजेको हुँ।” विदेश जान राहदानी ठिक्क पारिसकेका उनी कसैले ऋण नपत्याएपछि यस काममा लागेको र हाल यसैमा सन्तुष्ट रहेको सुनाउँछन्। “मलाई कसैले ऋण नपत्याएर ठिकै भएछ, पत्याएको भए त खै कुन देशमा कस्तो अवस्थामा हुन्थे! अचेल आफ्नै देशमा रमाइरहेको छु। ऋणको भारले थिचिनु परेको छैन, आम्दानी पनि ठिकै छ,” साहले भने। 

औरही बजारमा व्यापार गर्ने भंगाहा–३ का समिम कवारी पनि गर्मी बढेसँगै व्यापारसमेत बढ्ने भन्दै खुशी छन्। “उखुको व्यापार राम्रै हुन्छ तर गर्मी बढेपछि झनै माग बढ्छ। गर्मी भोग्दा त समस्या नै हुन्छ तर व्यापार पनि हुने भएकाले हाम्रा लागि त यो अवसरका रूपमा आउँछ। यसबाट हुने कमाइसँगै परिवारसँग बसेर खुशी साट्न पाउँला निकै रमाइलो लाग्छ,” उनले भने।

ठेला र मोटर जडानमा २ लाख जति लगानी गरेमा आफ्नै व्यापार गर्न पाइने भन्दै यसमा लागेका प्रायः सबैजसो व्यापारीहरू खुसी व्यक्त गर्छन्। त्यसैमा उधारोमा उखु किनेर जुसबाट भएको आम्दानीबाट त्यसको मूल्य चुक्ता गर्न पाइने हुँदा पनि यो व्यवसाय थप सहज हुने गरेको छ। यहाँ १ हजारमा प्रतिक्विन्टलमा उखु पाइने गरेको छ। प्रतिक्विन्टल १०० उखु छिल्न खर्च हुने गरेको छ। महोत्तरी, सर्लाही र धनुषामा उखुखेती बढी हुने भएकाले यहाँ कच्चा पदार्थ (उखु) खोज्न भौँतारिनु नपर्ने भएकाले पनि आफूहरू सहज हुने गरेको व्यापारीहरूको भनाइ छ। 

उखुको रस स्वास्थ्यका लागि पनि गुणकारी र कुनै अखाद्य वस्तुको मिसावट नहुने भएकाले पनि गर्मीयाममा यसको माग बढ्ने गरेको छ। बजारमा पाइने अन्य पेय पदार्थभन्दा उखुको जुसको स्वास्थ्यका दृष्टिले पनि लाभदायक हुने हुँदा तराई मधेशमा उपभोक्ताको रोजाइमा पर्ने गरेको बर्दिबास नगरपालिका, स्वास्थ्य शाखा प्रमुख सुरेश पासवानले बताए।