सरकारको निर्णय बदर माग गर्दै कुलमानले दिए सर्वोच्चमा रिट

काठमाडौँ– नेपाल विद्युत् प्राधिकरणको कार्यकारी निर्देशक पदबाट आफूलाई हटाउने सरकारको निर्णय बदरको माग गर्दै कुलमान घिसिङले सर्वोच्च अदालतमा रिट निवेदन दर्ता गराएका छन्।

सर्वोच्च अदालतका सूचना अधिकारी नीराजन पाण्डेका अनुसार बुधबार पेश भएको घिसिङको रिट निवेदन बिहीबार दर्ता भएको हो। उक्त विवादमा आगामी शुक्रबार सुनुवाइ हुने जनाइएको छ।

“नेपाल विद्युत् प्राधिकरणको कार्यकारी निर्देशकमा नियुक्ति गर्ने निर्णय र सम्पूर्ण कामकारबाही उत्प्रेषणको आदेशले बदर गरी उपरोक्त निर्णय एवं पत्र र कारबाहीको आधारमा निवेदकलाई नियुक्ति मितिदेखि चार वर्षको अवधि अगावै सेवाबाट हटाउने कार्य नगर्नु र सेवामा रही नियमित कामकाज गर्न नरोक्नु नरोकाउनु, कुनै बाधा व्यवधान नगरी यथावत् कामकारबाही गर्न दिनू‍,” रिट निवेदनमा भनिएको छ।

चार महिना कार्यकाल बाँकी छँदै सोमबारको मन्त्रिपरिषद् बैठकले घिसिङलाई नेपाल विद्युत् प्राधिकरणको कार्यकारी निर्देशकबाट बर्खास्त गरी हितेन्द्रदेव शाक्यलाई नियुक्त गरेको थियो।