सम्झौता भएको पाँच वर्षसम्म थालिएन म्याग्दीको दाङखोलामा पुल निर्माण

म्याग्दी– मालिका गाउँपालिका–५ र धवलागिरि गाउँपालिका–७ नम्बर वडाको सिमाना भएर बग्ने दाङखोलामा १८ मिटर लामो पुल निर्माण गर्न सम्झौता भएको पाँच वर्ष बितिसक्दा पनि काम शुरू भएको छैन।

धवलागिरि गाउँपालिका–७ का वडाध्यक्ष अशोक खत्रीका अनुसार २०७८ साल जेठमा सम्पन्न हुनुपर्ने पुलको निर्माण नै शुरू भएको छैन। २०७५ सालमा दाङखोलामा धवलागिरि गाउँपालिकाले निर्माण गरेको अस्थायी पुल जीर्ण भएको र नयाँ पुल निर्माण नहुँदा गुर्जा, लुलाङ, मुना, मुदी, ताकमका बासिन्दालाई आवागमनमा समस्या भएको छ।

पुल निर्माणस्थल म्याग्दीखोला जलविद्युत् आयोजनाको यसअघि प्रस्तावित बाँध निर्माणस्थलमा पर्दा सम्झौतालगत्तै कार्यक्षेत्रमा परिचालित निर्माण व्यवसायीले काम गर्न पाएका थिएनन्। २०७७ सालको बाढीले निर्माणस्थलमा क्षति पुगेको थियो। त्यसपछि पुलको दूरी बढाउनुपर्ने अवस्था आएपछि निर्माण प्रभावित भएको पूर्वाधार विकास कार्यालयले जनाएको छ। 

निर्माणको काम शुरू नै नभएपछि कार्यालयले ठेकेदारलाई पेश्कीस्वरुप प्रदान गरेको ३३ लाख रुपैयाँ फिर्ता लिएको छ।