अमेरिकी सिनेटमा २५ घण्टा लामो भाषण, को हुन् कोरी बुकर?

काठमाडाैँ– अमेरिकाको न्यु जर्सीका डेमोक्र्याटिक अमेरिकी सांसद (सिनेटर) कोरी बुकरले अमेरिकी कंग्रेसको माथिल्लो सदन अर्थात सिनेटमा अहिलेसम्मकै लामो भाषण गरेका छन्। यससँगै बुकरले पूर्वसांसद स्टर्म थर्मन्डको ६८ वर्ष पुरानो रेकर्ड पनि तोडे। सन् १९५७ मा थर्मन्डले नागरिक अधिकार ऐनको विरोधमा २४ घण्टा १८ मिनेट लामो भाषण गरेका थिए।

बुकरको भाषण २५ घण्टा पाँच मिनेटसम्म चल्यो। सोमबार राति ७ बजेबाट मंगलबार रातिसम्म गरेको उक्त भाषणमा उनले डोनाल्ड ट्रम्पको राष्ट्रपति प्रशासनले लोकतन्त्र र अमेरिकी जनतालाई निम्त्याउने 'गम्भीर र जरुरी' खतराको बारेमा चेतावनी दिने प्रयास गरेका थिए।

"म शारीरिक रूपमा सक्षम भएसम्म संयुक्त राज्य अमेरिकाको सदनको सामान्य काम कारबाहीलाई अवरुद्ध गर्ने उद्देश्यले उठेको छु," बुकरले आफ्नो भाषणको शुरूमै भने, "म रातभर बोल्नेछु किनकी हाम्रो राष्ट्र साँच्चिकै संकटमा छ।"

कोरी बुकरले आफ्नो भाषणको क्रममा राष्ट्रपति ट्रम्प र उनका नीतिहरूमाथि कडा आक्रमण गर्दै अमेरिका संकटतर्फ धकेलिँदै गएको चेतावनी दिए। बुकरले यो भाषण डेमोक्र्याट पार्टीका समर्थकहरूलाई ट्रम्प प्रशासनको विरुद्धमा गर्नुपर्ने सबै काम गरिरहेका छन् र सरकारको विरोध गरिरहेका छन् भनी देखाउन दिएका थिए।

भाषणका क्रममा बुकरले ट्रम्प सल्लाहकार एलोन मस्क नेतृत्वको सरकारी दक्षता विभागद्वारा सामाजिक सुरक्षा कार्यालयहरूमा कटौतीको विरुद्ध घण्टौँसम्म विरोध गरे। उनले ट्रम्पको प्रारम्भिक आदेशहरूको प्रभावहरू सूचीबद्ध गरे र सामाजिक सुरक्षा जालमा व्यापक कटौती हुन सक्ने चिन्ताहरूबारे कुरा गरे।

बुकरले ग्रिनल्यान्ड र क्यानडालाई गाभ्ने ट्रम्प प्रशासनको योजनाको पनि आलोचना गरे र यसले संवैधानिक संकट निम्त्याउन सक्ने बताए।

मंगलबार दिनभरि, बुकरले डेमोक्र्याटिक सहकर्मीहरूबाट सहयोग पाए। अल्पसंख्यक नेता चक शुमरसहित धेरै सिनेट डेमोक्र्याटहरूले लामो समयसम्म समर्थन प्रदर्शन गर्न फ्लोरमा उनीसँग सामेल भए। बुकरले कहिल्यै ब्रेकको लागि फ्लोर छोडेनन् किनकि त्यसो गर्दा अध्यक्षले सिनेटको काम अगाडि बढाउन सक्थे। मंगलबार साँझ शुमरले बुकरलाई उनले तोडेको रेकर्डका बारेमा अवगत गराए र सिनेट डेमोक्र्याटहरू ताली बजाउँदै उठे।

को हुन् बुकर?
सन् २०१३ देखि अमेरिकी कंग्रेसको सिनेटमा रहेका बुकर न्यु जर्सीको प्रतिनिधित्व गर्ने पहिलो अश्वेत अमेरिकी हुन् र हाल १०० सदस्यीय सिनेटमा रहेका पाँच जना अश्वेत सिनेटरहरूमध्ये एक हुन्।

५५ वर्षीय कोरी बुकरको जन्म वाशिंगटनमा भएको थियो र उनको परिवार बाल्यकालमा न्यु जर्सीमा सरेको थियो। बुकर अश्वेत समुदायका हुन्। जसले गर्दा उनले बाल्यकालमा पनि भेदभावको सामना गर्नुपरेको थियो। कोरीले स्ट्यानफोर्ड विश्वविद्यालयबाट स्नातक गरे र कलेजमा फुटबल खेलाडी थिए। त्यसपछि उनले येल ल स्कूलमा कानूनको अध्ययन गरे र गरिब परिवारहरूलाई कानूनी सहायता प्रदान गर्ने गैर-नाफामुखी संस्थाको लागि वकिलको रूपमा काम गरे।

कोरीले नेवार्क सिटी काउन्सिलमा सेवा गरे र त्यसपछि न्यु जर्सीको सबैभन्दा ठूलो शहर नेवार्कको मेयर बने। कोरी नेवार्कको मेयर हुँदा फेसबुकका संस्थापक मार्क जुकरबर्गले नेवार्कका विद्यालयहरूलाई १०० मिलियन डलर दान गरेका थिए। यसरी, उनको लोकप्रियता अत्यधिक बढ्यो।

तत्कालीन सिनेटर फ्रान्क लाउटेनबर्गको मृत्युपछि कोरी २०१३ मा अमेरिकी सिनेटमा निर्वाचित भएका थिए। सन् २०२० मा, कोरीले डेमोक्रेटिक पार्टीको तर्फबाट अमेरिकी राष्ट्रपति पदको लागि आफ्नो उम्मेदवारी पनि दर्ता गरेका थिए तर त्यसमा उनलाई सफलता मिलेन।

–एजेन्सीहरूको सहयोगमा