बैतडीमा असिनाले गहुँबाली र तरकारीमा क्षति

बैतडी– वर्षासँगै परेको असिनाले सुदूरपश्चिम प्रदेशमा बालीनाली र तरकारीमा क्षति पुगेको छ। शनिबार अपराह्न परेको असिनापानीले पाक्न लागेको गहुँबाली, तरकारी र बिरुवामा क्षति गरेको किसानले बताएका छन्।

बैतडीको दोगडाकेदार, सिगास, सुर्नया गाउँपालिका र पाटन नगरपालिकाका विभिन्न क्षेत्रमा असिनाले तरकारी, फलफूल र अन्नबालीमा क्षति पुर्‍याएको हो। बैतडीका साथै सुदूरपश्चिम प्रदेशका अन्य जिल्लामा पनि असिनापानीले अन्न र तरकारी बाली नष्ट गरेको जनाइएको छ।

अन्नबाली भित्र्याउने समयमा परेको असिनाले पाक्नै लागेको गहुँबालीमा व्यापक क्षति पुर्‍याएको सिगास गाउँपालिका–९ का रामबहादुर चन्दले जानकारी दिए। “असिनाले खेतबारी सेताम्मे भएका छन्। गहुँ पाकेर भित्र्याउने तयारी भएको थियो, सबै नष्ट गर्‍यो,” उनले भने। 

दोगडाकेदार–६ सित्तडका दलबहादुर कार्कीले पनि असिनाले गहुँबालीका तरकारी नष्ट गरेको बताए। फलफूल, आलु, प्याज, लसुन तथा  खुर्सानी र बन्दा, काउली, टमाटरका बेर्नामा क्षति पुगेको छ। “पाक्न थालेको बालीनाली र तरकारी  असिनापानीले सबै नष्ट पारेपछि उत्पादनमा कमी आउने देखिएको छ,” उनले भने। कृषि ज्ञान केन्द्रले यकिन विवरण आउन नसके पनि अन्नबाली र तरकारीमा क्षति पुगेको जनाएको छ।